Azərbaycan, Bakı, 22 dekabr / Trend, müxbir Ü.İsmayılova /
Azərbaycan Sığortaçılar Assosiasiyası (ASA) yaxın iki il ərzində fəaliyyət strategiyasını qəbul edib. Bu barədə çərşənbə axşamı ASA rəhbəri Azər Əliyev məlumat verib.
"Strateji plana görə ASA diqqəti əsasən sığortaçıların təhsil səviyyəsinin yüksəldilməsinə və ölkədə sığortanın təbliğinə yönəldəcək", - Əliyev deyib.
Onun sözlərinə görə, ilkin mərhələdə assosiasiya Maliyyə Nazirliyi ilə birgə fəaliyyət göstərmək fikrindədir.
"Azərbaycan Sığortaçılar Assosiasiyası qanunvericilik bazasının yaxşılaşdırılması üzərində ciddi çalışacaq, eləcə də sığortaçılarla birgə beynəlxalq təcrübəni öyrənməklə yeni məhsullar üzərində işləyəcək", - Əliyev deyib.
Azərbaycanda 27 sığorta və bir təkrar sığorta şirkəti fəaliyyət göstrərir. Bütün şirkətlər ASA-nın üzvləridir. Assoasiyaya üzvlük haqqı 5 min manat təşkil edir. ASA 2006-cı ilin dekabrında yaradılıb.
