Azərbaycan, Bakı, 23 dekabr /Trend, müxbir Ü.İsmayılova/
Azərbaycanın "Gunay Sığorta" şirkəti ilin sonunadək nizamnamə kapitalını daha bir milyon manat artırmaq niyytindədir. Bu barədə Trend-ə cümə axşamı şirkətin aktuarı İsgəndər İsgəndərov məlumat verib.
"Şirkətin kapitalı hazırkı iki milyon manatdan üç milyon manatadək artırılacaq", - İsgəndərov bildirib.
Onun sözlərinə görə, şirkətin kapitalının artırılması bütünlüklə səhmdarların vəsaitləri hesabına təmin olunacaq, çünki 2010-cu ildə şirkət az mənfəət əldə edib.
2010-cu il mayın 7-də "Gunay Sığorta"nın fəaliyyət lisenziyası Azərbaycan Maliyyə Nazirliyi tərəfindən müvəqqəti dayandırılmışdı. Buna səbəb şirkətin dövlət sığorta nəzarəti orqanının sığorta qanunvericiliyi ilə müəyyən olunmuş ödəniş qabiliyyəti normativləri və sığortaçıların maliyyə sabitliyinin yerinə yetirilməsi ilə bağlı tələblərinin ödənilməməsi olub. Lisenziya 2010-cu il avqustun 30-da bərpa edilib.
Azərbaycan Maliyyə Nazirliyi kapitallaşma cədvəlində düzəlişlər edib və sığortaçı kapitalına minimum tələb 2011-ci il yanvarın 1-nə 3,5 milyon manat (təkrar sığorta şirkətləri üçün 7 milyon manat), 2012-ci il yanvarın 1-nə 5 milyon manat (10 milyon manat) həcmində planlaşdırılıb.
1992-ci ildən fəaliyyət göstərən "Gunay Sığorta" şirkətinin təsisçisi Azərbaycanın "Gunay Bank" səhmdar bankıdır. Yanvar-noyabrda şirkətin mükafatları 0,63 milyon manat, ödənişləri 0,14 milyon manat olub.
Dekabrın 23-nə rəsmi məzənnə 0,7987 AZN/USD təşkil edir.
