Azərbaycan, Bakı, 25 dekabr /Trend, müxbir Ü.İsmayılova/
Azərbaycanın həyat sığortası şirkəti "Qala Həyat" gələcəkdə bazara daxil olmaqla Azərbaycanda həyat sığortasının inkişafını dəstəkləməkdə maraqlı olan beynəlxalq maliyyə institutları ilə fəal danışıqlar aparır. Bu barədə Trend-ə şirkətin idarə heyətinin sədri Abbas Babayev bildirib.
"Beynəlxalq institutlarla danışıqlar şirkətin əsas səhmdarı, Azərbaycanda yeganə təkrarsığorta şirkəti olan "Azre Tekrarsigorta" vasitəsilə aparılır", - Babayev deyib.
Onun sözlərinə görə, ölkənin həyat sığortası bazarında aparılan araşdırmalar göstərir ki, bu seqmentin inkişaf üçün böyük potensialı var. Hazırda sığorta ödənişlərinin ümumi portfelində həyat sığortasının payı bir faizdən az təşkil edir ki, oxşar tendensiya həyat sığortasının inkişaf etməkdə olan bütün bazarlarında müşahidə olunur.
"Ölkəmizdə dövlət dəstəyi həyat sığortasının inkişafı üçün əlavə təkan oldu. İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta, eləcə də "Sosial sığorta haqqında" qanuna və üç ildən artıq bir dövrdə həyat yığım sığortası üzrə vergi güzəştlərini nəzərdə tutan Vergi Məcəlləsinə əlavə və dəyişikliklər [sığorta mükafatlarının mənfəət vergisindən və sosial sığorta haqqından azad olunması] buna aşkar sübutdur", - Babayev deyib.
Onun fikrincə, dövlət bununla Azərbaycanda həyat sığortası bazarının inkişafını stimullaşdırır.
Qala Həyat öz fəaliyyətində ölkədəki maraqlanan bütün şirkət və strukturlarla əməkdaşlıq etmək fikrindədir.
"Biz bu gün bazarda yeganə rəqib olan Atəsgah Həyat şirkətilə, eləcə də Azərbaycan Sığortaçılar Assossiasiyası və ölkənin Maliyyə Nazirliyi ilə əhalinin, eləcə də işəgötürənlərin məlumatlandırmaq üçün sığortanın bu növü üzrə birgə və aktiv maarifləndirmə işlərinin aparılmasında əməkdaşlıq etmək fikrindəyik", - Babayev bildirib.
Şirkət həyat sığortasının təbliği çərçivəsində ölkənin regionlarında səyyar təlimlər də aparacaq.
Qala Sighorta ASC sığorta (təkrarsığorta) şirkəti və sığorta brokeri sığorta fəaliyyəti göstərmək üçün lisenziyasını 2008-ci il iyulun 31-də alıb. Şirkət lisenziyasını 2010-cu il noyabrın 30-da Qala Həyat adı ilə yeniləyib.
Şirkətin təsisçisi Azərbaycanda yeganə təkrarsığorta şirkəti ilan AzRE Təkrarsigortadır.
Dekabrın 25-nə rəsmi məzənnə 0,7985 AZN/USD təşkil edir.
