Azərbaycan, Bakı, 25 dekabr /Trend, müxbir N.İsmayılova/
Dekabrın 24-də Azərbaycan Maliyyə Nazirliyinin Dövlət Xəzinədarlığı Agentliyinin 1 saylı Xəzinədarlıq İdarəsinin inzibati binasının açılış mərasimi keçirilib. Bu barədə nazirliyin şənbə günü yaydığı məlumatda deyilir.
1 saylı Xəzinədarlıq İdarəsi Dövlət Xəzinədarlığı Agentliyinin ən böyük idarələrindən olmaqla, yüzə yaxın iri büdcə təşkilatlarına xidmət göstərir. İdarənin xəzinə xidməti göstərilən büdcə təşkilatlarının xərcləri dövlət büdcəsinin 80-85 faizini təşkil edir. Ölkədə agentliyin 2, 5 və 10 saylı xəzinədarlıq idarələri üçün də yeni inzibati binaların tikintisi üçün lazımi tədbirlər həyata keçirilir.
Xəzinənin avtomatlaşdırılması dövlət sektoru təşkilatlarının işinin təkmilləşdirilməsi və dövlət büdcəsinə nəzarət proqramı çərçivəsində həyata keçirilir. Bu isə aktual maliyyə informasiyasına daimi girişin olmasına şərait yaradacaq.
Xəzinənin tam avtomatlaşdırılması hesab və xəzinə əməliyyatları aparmağa şərait yaradacaq. Bunun nəticəsində də büdcə vəsaitlərinin xərclənməsi mexanizmi möhkəmlənəcək, büdcə əməliyyatlarının icra edilməsi tezləşdiriləcək və keyfiyyəti artacaq. Maliyə Nazirliyi hazırkı layihənin vacibliyini nəzərə alaraq Dövlət Xəzinəsinin mərkəzi serverlərini tamamilə yeniləşdirir və Bakı xaricində ehtiyat serverlər kompleksi yaradır.
Xəzinənin avtomatlaşdırılması dövlət ehtiyatlarına qənaət edilməsinə və büdcə vəsaitlərinin gizlədilməsi faktlarının aradan qaldırılmasına imkan yaradacaq.
MySAP ERP proqramlarının tətbiqi təkcə mühasibat hesablarının beynəlxalq prinsiplərinə keçməyə deyil, həmçinin vergi-büdcə sisteminin təkmilləşdirilməsinə şərait yaradacaq.