Azərbaycan, Bakı, 27 dekabr /Trend, müxbir Ü.İsmayılova/
"Şahdağ" qış-yay turizm kompleksi gələn qışa ilk turistləri qəbul edə bilər. Bu barədə bazar ertəsi Azərbaycanın mədəniyyət və turizm naziri Əbülfəs Qarayev deyib.
"Bu qışın sonunadək kompleksin süni yaşıllaşdırılması üzrə işlər başa çatdırılacaq, beş liftdən biri quraşdırılacaq. Yayda biz mehmanxananı istismara verəcəyik", - nazir bildirib.
Onun sözlərinə görə, bu günə kompleksin tikintisi üzrə işlər dövlətin vəsaitləri hesabına aparılır. "Dövlət vəsaitləri hesabına həyata keçirilməsi nəzərdə tutulan işlərin yarısı görülüb. Hazırda marketinq araşdırmaları aparılır. Xarici vəsaitlərin cəlb edilməsi barədə danışmaq hələ ki tezdir", - Qarayev əlavə edib.
10 illik layihənin dəyəri iki milyard avro qiymətləndirilir. Əvvəllər nazirin dediyi kimi, kompleksin tikintisinin 25 faizi dövlətin, 75 faizi isə özəl sektorun hesabına təmin ediləcək.
Beynəlxalq investorların kapitalı servis infrastrukturunun yaradılması üçün cəlb ediləcək.
Nazir hesab edir ki, "Şahdağ" qış istirahəti zonasının tikintisinə dövlət hesabına qoyulan investisiyalar 7-10 ildən sonra öz xərcini çıxaracaq və beş min yeni iş yeri yaradacaq.
"Şahdağ" qış-yay turizm kompleksinin tikintisi dağ-xizək idmanı və digər qış idman növləri ilə məşğul olmaq üçün geniş imkanlar yaradacaq. Kompleksin ərazisində tennis kortları, futbol və basketbol meydançaları, örtülü idman qurğuları, akvapark və hovuzlar, əyləncəli oyun kompleksləri olacaq. Kompleksdə müxtəlif məsafəli 21 kanatlı yol çəkiləcək. Xizəkçilərin xizək yolunun yüksəkliyinə çatdırılmaları üçün kürsü tipli qaldırıcı qurğulardan istifadə ediləcək. Xizək yolları müxtəlif dərəcəli mürəkkəbliklə layihələşdirilib.
Ümumi sahəsi 2 min hektardan çox olan kompleksin tikintisi 4 mərhələdə həyata keçiriləcək. Birinci mərhələdə vacib kommunikasiya xətləri çəkiləcək, 11 qaldırıcı, xizək yolları, süni göl və qar avadanlığı quraşdırılacaq. 312 yerlik beşulduzlu, 346 yerlik dördulduzlu, 282 yerlik üçulduzlu hotellərin və kiçik yaylaq evlərinin, kotteclərin tikilməsi planlaşdırılır.
İkinci mərhələdə qaldırıcılar şəbəkəsinin və mədəni-idman qurğularının, kotteclərin tikintisi və bağların salınması nəzərdə tutulur. Üçüncü mərhələ əlavə xizək yollarının salınmasını və yaşayış zonasının genişləndirilməsini əhatə edir.
Dəniz səviyyəsindən iki min metr yüksəklikdə tikiləcək mərkəzdə 5 min işçi çalışacaq. Kompleksdə ticarət mərkəzləri, restoranlar, əyləncə və servis obyektləri, o cümlədən avtomobillər üçün yeraltı və yerüstü obyektlər tikiləcək.
2011-ci ildə başa çatacaq tikinti işlərinə Mədəniyyət və Turizm Nazirliyi nəzarət edir.
"Şahdağ" kompleksində Azərbaycanda ilk dəfə olaraq vahid idarəetmə sistemi yaradılacaq.
