Azərbaycan, Bakı, 7 yanvar /Trend, müxbir Ü.İsmayılova/
Yanvarın birinci yarısında Azərbaycanda həyat sığortası üzrə ixtisaslaşmış üçüncü şirkət olan "PAŞA Həyat Sığorta" ASC-nin sığorta fəaliyyəti üzrə lisenziya alacağı gözlənilir. Bu barədə "Paşa Sığorta" şirkətinin idarə heyətinin sədri Nofəl Rzayev cümə günü bildirib.
"Lisenziyalaşdırılma prosesi 30 gündən 60 günədək davam edir və bu müddət yanvarın birinci yarısında başa çatır", - Rzayev deyib.
Onun sözlərinə görə, ölkənin Maliyyə Nazirliyi yanında Dövlət Sığorta Nəzarəti Xidmətinin icazəsi əsasında "Paşa Həyat Sığorta" artıq Vergilər Nazirliyində qeydiyyatdan keçib və lisenziya aldıqdan sonra aktiv fəaliyyətə başlayacaq.
Bu gün ölkədə həyat sığortası üzrə ixtisaslaşmış "Atəşgah Həyat" və "Qala Həyat" şirkətləri fəaliyyət göstərir. "Sığorta fəaliyyəti haqqında" qanuna uyğun olaraq, 2011-ci ilin martından sonra həyat sığortası ilə yalnız ixtisaslaşmış şirkətlər məşğul ola bilərlər.
"Paşa Həyat Sığorta" yeddi milyon manatlıq kapitalla bazara çıxır. Odur ki, "Paşa Həyat Sığorta" ölkənin sığorta həyatında nisbətən daha çox kapitallaşmış şirkət olacaq. Yaradılan sığorta şirkətinə Maliyyə Nazirliyinin kapitallaşma tələbləri beş milyon manatdır. Yeni şirkətin yeganə səhmdarı "Paşa Holdinq"dir.
"Paşa Həyat Sığorta"nın ilkin portfeli "Paşa Sığorta" şirkətinin formalaşdığı həyat sığortası üzrə toplanan sığorta mükafatlarının həcmindən təşkil olunacaq.
Rzayevin sözlərinə görə, "Paşa Sığorta" həyat sığortası üzrə icazəyə malikdir və bu gün təqribən 300 min manat səviyyəsində formalaşan həmin portfel Life-şirkətə veriləcək. Bununla yanaşı, hazırda "Paşa Həyat Sığorta" yeni məhsullar hazırlayır, bu məhsullar və şirkətin üçillik fəaliyyət strategiyası çərçivəsində təsdiqlənmiş planlar lisenziya alındıqdan sonra elan ediləcək.
"Paşa Həyat Sığorta" şirkətinin idarə heyətinin sədri Mürsəl Rüstəmov təyin edilib, onun yeganə müavini isə Niyaz İsmayılov olub. O, əvvəllər şirkətin baş texniki direktoru vəzifəsini icra edib.
"Paşa Holdinq" qrupunun üzvü olan "Paşa Sığorta" korporativ və fərdi müştərilərə sığortanın 31 növü üzrə xidmətlər göstərir. 28 milyon manatlıq məcmu aktivləri ilə "Paşa Sığorta" kapitallaşmanın həcmi üzrə ölkənin aparıcı sığortaçıları üçlüyünə daxildir, şirkət eyni zamanda ölkənin sığorta sektorunda biznesin rentabelliyi üzrə nisbətən daha yüksək göstəriciyə malikdir. Şirkətin nizamnamə kapitalı 20 milyon manat təşkil edir.
Yanvarın 7-nə olan rəsmi məzənnə 0,7977 AZN/USD təşkil edir.
