Azərbaycan, Bakı, 12 yanvar /Trend, müxbir N.İsmayılova/
"Parabank" cari ilin fevral ayında beş milyon manat həcmində subordinasiya olunmuş tabeli istiqrazlar buraxmağı planlaşdırır. Bu barədə çərşənbə günü bankın xəzinə departamentinin rəhbəri Elnur Ağayev deyib.
"İstiqrazlar beş illik müddətinə 14 faizli tariflə buraxılacaq", - Ağayev bildirib.
Onun sözlərinə görə, bir istiqrazın nominal dəyəri min manat təşkil edir. Beləliklə, bank 5000 istiqraz buraxır.
"Parabank" 1991-ci ildə kommersiya bankı kimi yaradılıb. Azərbaycanın ilk kommersiya banklarından biri olan "Parabank" yaradıldığı gündən öz müştərilərinə geniş çeşiddə universal maliyyə xidmətləri təqdim edir. 2007-ci ilin iyulundan etibarən "Parabank" ASC Azərbaycan Əmanətlərin Sığortalanması Fondunun üzvüdür.
Yanvarın 12-nə olan rəsmi məzənnə 0,7976 AZN/USD təşkil edir.
