Azərbaycan, Bakı, 19 yanvar /Trend, müxbir H.Vəliyev/
2010-cu ildə Azərbaycanın metallurgiya sənayesi və hazır metal istehsalı müəssisələri tərəfindən 171,4 milyon manat məbləğində məhsul istehsal edilib və xidmət göstərilib. Bu barədə çərşənbə günü Dövlət Statistika Komitəsinin məlumatında deyilir.
2010-cu ildə metallurgiya sənayesində istehsalın həcmi 44,6 faiz artıb, hazır metal məhsullarının istehsal həcmi isə 5 faiz azalıb.
Ötən dövr ərzində 128,6 min ton tökmə polad istehsal edilib ki, bu da 2009-cu ilin göstəricisindən 63,1 faiz çoxdur.
Armatur istehsalının həcmi 130,3 min ton təşkil edərək 2009-cu ildəkindən 35,2 faiz artıb.
Qara metallardan hazırlanan naqil və kanatların istehsal həcmi 1111,9 ton təşkil edib ki, bu da 2009-cu ildə qeydə alınan göstəricidən 3,4 dəfə çoxdur.
Tökmə çuqun istehsalı 2009-cu ilə nisbətən 41,6 faiz azalaraq həcmi 907,7 ton olub.
Polad boru 36,5 min ton həcmində istehsal edilib ki, bu da 2009-cu ilin göstəricisindən 5,3 dəfə çoxdur.
Qara metallardan hazırlanan yarımfabrikatların ixrac həcmi 11 ayın yekunlarına əsasən 89,1 min tonu ötüb (42 milyon dollardan artıq məbləğdə) ki, bu da 2009-cu ilin müvafiq dövr göstəricisindən 5,3 dəfə çoxdur (pula çevirdikdə təxminən 6,4 dəfə).
Yanvar-noyabrda qara metallardan hazırlanan boruların ixracı 32,1 min tondan çox olub ki (25,8 milyon dollardan yuxarı məbləğdə), bu da 2009-cu ilin müvafiq dövr göstəricisindən 6,7 dəfədən çoxdur.