2010-cu ildə Avropa İrana mal ixracını 32 faiz azaldıb – Aİ-nin iqitisadi müşaviri

Azərbaycan, Bakı, 20 yanvar /Trend, müxbir D.Xatınoğlu/

2010-cu ildə Avropa mallarının İrana ixracı ən azı 32 faiz azalıb. Bu barədə Trend-ə Avropa İttifaqının iqtisadi müşaviri Mehrdad Emadi bildirib.

"Avropa ölkələrinin gömrük idarələrinin statistikasına əsasən, maşın və nəqliyyat avadanlıqları sahəsində İrana ixracat bir xeyli azalıb, bu isə İranda sənaye istehsalı sahəsinə əsas zərbədir", - Emadi deyib.

Onun fikrincə, Avropa ilə İran arasında ticarət dövriyyəsinin azalmasına əsas səbəb İrana qarşı sanksiyalardır.

Avropa Komissiyası saytında yerləşdirilən məlumata əsasən, Avropa 2009-cu ildə İrana 18,4 milyard avro məbləğində mal ixrac edib. Bunun 54,6 faizini maşın və nəqliyyat avadanlıqları, 16,9 faizini isə sənaye məhsulları təşkil edir. Beləliklə, 2008-ci il ilə müqayisədə 2009-cu ildə Avropa mallarının İrana ixracı 45 faiz azalıb.

Rəsmi Tehran isə bu qənaətdədir ki, beynəlxalq sanksiyalar İranın Avropa ölkələri ilə iqtisadi əməkdaşlığına mane olmur.

Amlaniya İranın Avropada ən böyük iqtisadi tərəfdaşıdır. İran Gömrük İdarəsinin statistikasına əsasən, 2010-cu ilin mart-dekabr aylarında İranın ümumi idxalının təxminən 7 faizi Almaniyanın payına düşür.

Press TV-nin Agence France-Presse-ə istinadən verdiyi məlumata görə, Almaniya mallarının İrana idxalı 2010-cu ilin yanvar-noyabr aylarında 4,7 milyard dollar təşkil edib ki, bu da ötən illə müqayisədə 2,6 faiz çoxdur.

"Reuters" agentliyinin Almaniya Federal Statistika İdarəsinə istinadən verdiyi məlumata əsasən, 2010-cu ilin son rübündə Almaniya mallarının İrana ixracı həmin ilin birinci rübü ilə müqayisədə 14 faiz azalıb.