Azərbaycan, Bakı, 26 yanvar/Trend, müxbir Ü.İsmayılova/
Azərbaycan Turizm Assosiasiyasına turistlərdən əsasən turizm şirkətlərinin fəaliyyəti ilə bağlı şikayətlər daxil olur. Bu barədə çərşənbə günü Azərbaycan Turizm Assosiasiyasının rəhbəri Nahid Bağırov deyib.
"Bakıdakı hotellərin fəaliyyəti ilə bağlı şikayət hələ ki daxil olmayıb", - o bildirib.
Onun sözlərinə görə, turistlər əsasən turizm şirkətləri tərəfindən hotellər təklif edilən zaman aldadıqlarından şikayət edirlər, belə ki, şirkət bir hotel təklif edir. Gedəndə isə aydın olur ki, bu, təklif olunan hotel deyil. Turizm şirkətlərinin göstərdikləri xidmətlərlə də bağlı problemlər var.
"Yəqin ki, yüksək səviyyədə xidmət göstərməyən hotellər var, onların bəzilərində antisanitar şərait hökm sürür, lakin həm yerli, həm də xarici turistlər tərəfindən şikayət assosiasiayaya daxil olmayıb", - Bağırov qeyd edib.
Bağırovun sözlərinə görə, Azərbaycan İqtisadi İnkişaf Nazirliyi ilə birlikdə yaxın vaxtlarda başlayacaq monitorinqlərin məqsədlərindən biri belə faktların müəyyənləşdirilərək onların gələcəkdə aradan qaldırılması və turizm şirkətlərində göstərilən xidmətin yaxşılaşdırılmasıdır.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. İdarə heyətinin tərkibinə "Improtex Travel", "Caspian Travel", "Pasha Travel", "Silkway Travel" və "Euroturizm" şirkətlərinin rəhbərləri daxildir.
