Azərbaycan, Bakı, 5 fevral/Trend, müxbir N.İsmayılova/
Azərbaycanda şəkər istehsalı üçün xammala olan tələbatı ödəmək üçün şəkər çuğundurunun əkin sahələrini 20 min hektaradək artırmaq lazımdır. Bu barədə şənbə günü Trend-ə kənd təsərrüfatı nazirinin müavini Bəhram Əliyev deyib.
"Şəkər çuğundurunun istehsal səviyyəsinin artırılması bizim vəzifələrimizdən biridir. Məlum olduğu kimi, İmişli zonasında onun istehsalı ilə məşğuldurlar, bundan sonra o, emal üçün İmişli şəkər zavoduna göndərilir", - Əliyev bildirib.
Əliyevin fikrincə, ölkədə daxili tələbatı tam ödəmək üçün şəkər çuğundurunun əkin sahələrini 20 min hektaradək artırmaq lazımdır.
"Bunun üçün gələcəkdə şəkər çuğundurunun emalı üzrə ikinci zavodun tikintisinə ehtiyac yarana bilər, lakin sahələrin prioritetliyini nəzərə alaraq, bizim üçün hazırda vacib taxıldır", - o qeyd edib.
Əliyevin sözlərinə görə, hazırda ölkədə şəkər çuğundurunun əkin sahəsi 10-12 min hektar təşkil edir.
Azərbaycanda şəkər istehsalı üçün xammalın çox hissəsi idxal edilir. İstehsalın müəyyən hissəsi ölkədə becərilən şəkər çuğundurunun emalı sayəsində həyata keçirilir. 2009-cu ildə İmişli şəkər zavodu tərəfindən 3 min torpaq mülkiyyətçisi ilə istehsal müqaviləsi bağlanıb və minlərlə hektar ərazidə şəkər çuğunduru əkilib.
Bu gün zavodda istehsal olunan şəkər həm ölkənin daxili tələbatının, həm də ixracın ödənilməsinə gedir və zavod üçün məhsulunun rəqabətqabiliyyətli olması mühüm əhəmiyyət kəsb edir. İmişli zavodunun məhsulu Türkmənistan, Əfqanıstan, Gürcüstan, Ukrayna və İraqa ixrac edilir.