Azərbaycan, Bakı, 9 fevral /Trend, müxbir Ü.İsmayılova/
Azərbaycanda qiymətləndiricilərin sertifikatlaşdırılmasının növbəti (dördüncü) mərhələsi mayda keçiriləcək. Bu barədə çərşənbə günü Azərbaycan Qiymətləndiricilər Cəmiyyətinin əlaqələndiricisi Amil İsmayılov məlumat verib.
"Hazırda cəmiyyətdə sertifikatlaşdırmanın növbəti mərhələsinə hazırlıq işləri görülür, o cümlədən ölkənin daşınmaz əmlak bazarı barədə informasiyanın toplanması həyata keçirilir", - İsmayılov bildirib.
Onun sözlərinə görə, qiymətləndirmə fəaliyyətinin sertifikatlaşdırılması prosesində iştirak etmək istəyənlərin sayı az deyil, lakin Qiymətləndiricilər Cəmiyyəti yalnız müvafiq tələblərə cavab verən şəxsləri seçəcək.
Bundan əvvəl İsmayılovun dediyi kimi, qiymətləndiricilərin sertifikatlaşdırılmasının üçüncü mərhələsinə müşahidəçi qismində Rusiya Qiymətləndiricilər Cəmiyyətindən, Beynəlxalq Maliyyə Korporasiyasından (BMK) mütəxəssislər, eləcə də xidmətin bu növünün inkişafında maraqlı olan yerli dövlət strukturlarının nümayəndələri dəvət olunublar.
Azərbaycanda qiymətləndirmə fəaliyyətinin sertifikatlaşdırılmasının birinci mərhələsi 2009-cu ilin martında keçirilib və həmin mərhələdən üç qiymətləndirici keçib. Dörd qiymətləndiricinin keçdiyi ikinci mərhələ elə həmin ilin iyununda baş tutub. Üçüncü mərhələdə isə (2010-cu il 21 aprel) təlim iştirakçılarından heç biri bu prosedurdan keçə bilməyib.
Qiymətləndiricilərin sertifikatlaşdırılması prossesində müşahidəçi kimi Beynəlxalq Maliyyə Korporasiyasının, Rusiya Qiymətləndiricilər Cəmiyyətinin və İqtisadi əlaqələr üzrə İsveçrə Dövlət Katibliyinin (SECO) mütəxəssislər iştirak edirlər.
Azərbaycan Qiymətləndiricilər Cəmiyyəti 1997-ci ildə qeydiyyatdan keçib. Azərbaycanda qiymətləndirmənin fəaliyyəti 1995-ci ildə qəbul edilmiş "Qiymətləndirmə fəaliyyəti haqqında" qanunla tənzimlənir. Təşkilat bütün qiymətləndiriciləri özündə birləşdirir.
