Azərbaycan, Bakı, 10 fevral /Trend, müxbir İ.Xəlilova/
Asiya İnkişaf Bankı (AİB) Azərbaycanda şəhər nəqliyyatının inkişafının maliyyələşdirilməsi imkanlarının öyrənilməsinə başlayıb. Bu barədə cümə axşamı bankın Bakı nümayəndəliyindən bildirilib.
Məlumata görə, tərkibində şəhər nəqliyyatı üzrə mütəxəssislər Arnaud Daufinin və Bertrand Qoalunun olduğu AİB Şəhər inkişafı və su təsərrüfatı departamentinin ilk məsləhət missiyası Bakıdadır.
Səfər fevralın 12-dək davam edəcək. Nəqliyyat Nazirliyində, "Azərbaycan Dəmir Yolları" QSC, Bakı metropolitenində görüşlərin keçirilməsi planlaşdırılıb.
"Asiya bankı şəhər nəqliyyatında istənilən istiqaməti maliyyələşdirməyə hazırdır, lakin bankın yardımını alarkən prioritetlər və hökumətin tələbatı görüşlər zamanı müəyyən ediləcək", - nümayəndəlikdən bildirilib.
Hazırda AİB Gürcüstanda şəhər nəqliyyat üzrə böyük layihələr həyata keçirir.
Azərbaycan 1999-cu ildən AİB-in üzvüdür. 2010-cu ilin əvvəlinə bankın ölkə üzrə kredit portfeli 660,4 milyon dollar təşkil edib. Əməkdaşlıq dövründə AİB Azərbaycan hökumətinə və yerli şirkətlərə ümumi məbləği 13,122 milyon dollar həcmində qrantlar da ayırıb.
AİB ölkədə energetika, nəqliyyat, şəhər təsərrüfatı üzrə həm dövlət, həm də özəl sektorlarında layihələri maliyyələşdirir.
AİB 1966-cı ildə təsis edilib və 67 üzvü var. Onun mənzil-qərargahı Filippinin paytaxtı Manilada yerləşir. Azərbaycan Asiya Bankının üzvlüyünə 1999-cu il dekabrın 22-də qəbul edilib və onun bankın kapitalında iştirak payı 0,5 faizdir.
AİB-in aparıcı səhmdarları Yaponiya və ABŞ (ümumi səhmdar kapitalın 31,2 faizi), Hindistan və Çin (12,8 faiz), Avstraliya, Cənubi Koreya, Kanada (16 faiz) və başqalarıdır.
