Azərbaycan, Bakı, 24 fevral /Trend, müxbir Ü.İsmayılova/
Azərbaycan dövlət lizinq şirkəti "Aqrolizing" soyuducu kameraların, istixanaların, suvarma avadanlıqlarının və onların quraşdırılması üzrə işlərin, eləcə də QSC-yə məxsus texnikanın, qurğuların, maşın mexanizmlərinin və mineral gübrələrin sığortalanması üzrə tender elan edib. Bu barədə tender komissiyasının məlumatında deyilir.
Tender 11 lotda keçiriləcək. Məlumatda deyilir ki, tender təkliflərinin qiymətləndirilməsi zamanı qüvvədə olan standartlara uyğun aşağı qiymət, eləcə də göstərilən xidmətlərin müddəti və keyfiyyəti üzrə öhdəliklər götürən iddiaçılara üstünlük veriləcək.
İddiaçılar maliyyə və texniki imkanlara malik olmalıdırlar.
1-ci və 2-ci lotlarda iştirakın dəyəri 500 manat təşkil edir. 4, 5, 8 və 11-ci lotlarda 100 manat, 3,6,7-də 1000 manat , 9-da 200 manat, 10-cu lotda iştirak üçün 300 manat ödəmək lazımdır.
Tender təklifləri aprelin 19 -dək qəbul olunacaq. Tender proseduru aprelin 20 -də "Aqrolizing" ASC-nin inzibati binasında keçiriləcək.
"Aqrolizing" ASC 2004-cü ilin oktyabrında yaradılıb və Kənd Təsərrüfatı Nazirliyinin strukturuna daxildir. Müəssisə ölkənin 55 rayonunda servis xidməti məntəqələrinə malikdir. 2011-ci ildə dövlət büdcəsindən "Aqrolizing" üçün 35 milyon manat vəsait ayrılıb. Bu vəsaitin 12 milyon manatının traktorların və kənd təsərrüfatı texnikasının alınmasına yönəldilməsi planlaşdırılır.
