Azərbaycan, Bakı, 28 fevral /Trend, müxbirlər A.Axundov, A.Tağıyeva/
Birləşmiş Ərəb Əmirlikləri (BƏƏ) ilə Azərbaycan arasında uğurlu ticari əlaqələrin tarixinə diqqət yetirsək, gələcəkdə iki ölkə arasında mal dövriyyəsinin durmadan artımının davam edəcəyini gözləmək olar. Bu barədə BƏƏ-nin xarici ticarət naziri Lübna bint Xalid əl-Qasımi Trend-ə müsahibəsində bildirib.
"2001-ci ildən başlayaraq BƏƏ və Azərbaycan qarşılıqlı ticari əlaqələrin sabit inkişafı dövrünü yaşayır. Bu inkişaf özəl sektor üçün hər iki ölkədə biznes aparmaq imkanlarını araşdırmağa şərait yaradıb", - əl-Qasımi deyib.
Onun sözlərinə görə, 2010-cu ilin ilk on ayı ərzində BƏƏ-dən Azərbaycana ixrac 20 milyon dollar, təkrar ixrac 90 milyon dollar təşkil edib ki, bu zaman Azərbaycana 1,1 milyon dollar məbləğində mal idxal olunub. Bu dövrdə iki ölkə arasında mal dövriyyəsi 110 milyon dollar təşkil edib.
Azərbaycan Dövlət Statistika Komitəsinin məlumatına görə, 2010-cu ilin yekunları üzrə BƏƏ ilə xarici ticarət dövriyyəsi 71,48 milyon dollar təşkil edib.
Bu zaman 14,9 milyon dollar həcmində ixrac əməliyyatları həyata keçirilib, idxal əməliyyatlarının payına isə 56,56 milyon dollar düşüb.
2010-cu ildə BƏƏ-dən idxal Azərbaycanın ümumi idxal həcminin 0,86 faizini təşkil edib.
Əl-Qasıminin sözlərinə görə, Azərbaycandan BƏƏ-yə idxal olunan əsas məhsullar təbii və süni yetişdirilmiş mirvari, qiymətli və yarımqiymətli metallar, zərgərlik məmulatları, alüminium və meyvədir.
"Azərbaycana əsasən qayıqlar, gəmilər, plastik, mebel, döşəklər, işıqlandırma aparatları ixrac olunur. Təkrar ixrac mallarına avtomobillər, onların ehtiyat hissələri və aksesuarlar, traktorlar, avadanlıqlar və məişət texnikası daxildir", - nazir bildirib.
Onun sözlərinə görə, BƏƏ və Azərbaycan arasında ikitərəfli əməkdaşlıq iqtisadiyyatın bütün sahələrini əhatə edir. Lakin bu zaman ticarət, investisiyalar, energetika, sənaye, maliyyə, bank işi, turizm, kənd təsərrüfatı, gömrük və səhiyyəyə xüsusi diqqət ayrılır.
"Bütün bu sahələr azərbaycanlı sərmayədarlar üçün açıqdır və biz onları mövcud imkanları, xüsusən də qeyri-neft sektorunu araşdırmağa dəvət edirik", - əl-Qasımi deyib.
Onun sözlərinə görə, BƏƏ və Azərbaycan qarşılıqlı investisiyaların müdafiəsi və cəlb edilməsi sahəsində gəlirə və əmlaka ikiqat vergitutmanı aradan qaldırmaq məqsədilə saziş imzalayıblar, eləcə də 2008-ci ildə ticari münasibətlərin genişləndirilməsi üçün ticari-iqtisadi və elmi-texniki əməkdaşlıq üzrə birgə iqtisadi komissiya yaradıblar.
"BƏƏ özünün əla infrastrukturu, investisiyaya yönəldilmiş siyasəti və siyasi sabitliyi ilə şübhəsiz ki, regionda biznes üçün ən cəlbedici yerlərdən biridir. BƏƏ investorlar üçün əlverişli mühit yaradır, regiondan, eləcə də bütün dünyadan sahibkarlar üçün böyük imkanlar təqdim edir", - əl-Qasımi bildirib.