Azərbaycan, Bakı, 2 mart /Trend, müxbir N.İsmayılova/
Xəzər Beynəlxalq İnvestisiya Şirkəti (CIIC) mayda Bakı yaxınlığında yaşayış kompleksinin tikintisi layihəsinin təqdimatını keçirəcək. Trend-in məlumatına görə, bu barədə çərşənbə günü şirkətin icraçı direktoru Toğrul Köçərli deyib.
"Hazırda infrastrukturun - yolların, kommunikasiya, yaşıllaşdırmanın yaradılması üzrə işlər aparılır. İnfrastrukturun tikinti hissəsi praktiki olaraq başa çatıb və mayda layihə geniş ictimaiyyətin diqqətinə çatdırılacaq", - Köçərli qeyd edib.
Şirkətin layihəsi Bakının 18 kilometrliyində yerləşən Saray qəsəbəsində 169 villanın tikintisini nəzərdə tutur. CIIC bu layihənin maliyyələşdirilməsinə 6,4 milyon manat yönəldib. Bu, layihənin ümumi dəyərinin 20 faizini təşkil edir. Layihəyə əsasən, kompleksdə uşaq bağçasının, idman-əyləncə mərkəzinin inşası da nəzərdə tutulub.
Layihənin 2011-ci ilin birinci rübündə tam başa çatıdırılması gözlənilir.
Hazırda CIIC üç layihəni maliyyələşdirib. İkinci layihə Samuxda gücü 25 min ton olan soyuducu-anbar kompleksininin tikintisini nəzərdə tutur. CIIC və "N.A.A. Agrotara" MMC arasında investisiya qoyuluşu haqqında saziş ötən ilin iyununda imzalanıb. Şirkətin bu layihəyə investisiyalarının ümumi həcmi 5,5 milyon manat təşkil edir.
Üçüncü layihə ölkənin aqrobiznesinin və kənd təsərrüfatının inkişafına yönəlib.
Layihə ölkədə kahı istehsalının maliyyələşdirilməsini nəzərdə tutur. Layihə çərçivəsində müasir tələblərə cavab verən istixanalar tikiləcək. CIIC layihənin ümumi dəyərinin 68 faizini maliyyələşdirəcək. Bu, 1,5 milyon manat təşkil edəcək.
Azərbaycanın İnvestisiya Şirkəti (AİŞ) və Özəl Sektorun İnkişafı üzrə İslam Korporasiyası (ICD) tərəfindən təsis edilən Xəzər Beynəlxalq İnvestisiya Şirkəti 2008-ci ilin mayında 2,954 milyon manatlıq ilkin kapitalla qapalı səhmdar cəmiyyət kimi qeydiyyatdan keçib. AİŞ-in iştirak payı 25 faiz, ICD-nin 75 faiz təşkil edib.
Kapitalın ötən ilin sentyabrın 23-nə kimi artırılması üçün Qiymətli Kağızlar üzrə Dövlət Komitəsi CIIC-ın 62040 səhminin emissiya prospektini qeydə alıb. Hər bir səhmin nominal dəyəri 850 manatdır.
Strategiyaya əsasən, CIIC-ın investisiyaları şəriət qaydalarına zidd olan spirtli içkilər və donuz əti məhsullarının istehsalı üzrə müəssisələr istisna olmaqla, iqtisadiyyatın real sektoruna, həmçinin maliyyələşdirmə və sığorta xidmətlərinin göstərilməsində standart şərtlərlə fəaliyyət göstərən bank və sığorta təşkilatlarına qoyulacaq.
Martın 2-nə olan rəsmi məzənnə 0,7939 AZN/USD təşkil edir.
