Azərbaycan, Bakı, 2 mart /Trend, müxbir Ü.İsmayılova/
Azərbaycan Əmək və Əhalinin Sosial Müdafiəsi Nazirliyi yanında Əmək Müfəttişliyi fevral ayı ərzində Bakıda və ölkənin regionlarında təxminən 400 istehsalat obyektində istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanın tətbiqi ilə bağlı monitorinqlər keçirib. Bu barədə çərşənbə günü Əmək Müfəttişliyinin rəhbəri Məhərrəm Məhərov bildirib. Müfəttişlik işçilərin icbari sığortası üzrə yoxlamalara fevralın 1-dən başlayıb.
"Müfəttişlik monitorinqlərin birinci ayında əsasən işəgötürənlər və işçilər arsında maarifləndirmə işləri aparıb, eləcə də sığorta xidmətlərinin yeni növünün tətbiqi üzrə tövsiyələr təqdim edib", - Məhərov deyib.
Onun sözlərinə görə, bununla əlaqədar fevral ayı ərzində cərimə sanksiyaları tətbiq edilməyib.
Bir müddət əvvəl Məhərovun dediyi kimi, müfəttişlər hər gün 5-10 istehsalat obyektində icbari sığortanın tətbiqi ilə bağlı monitorinqlər keçirirlər. Müfəttişliyin regional nümayəndəliklərinin əməkdaşları da hər gün 5-10 istehsalat obyektində monitorinqlər keçirirlər.
Məhərovun sözlərinə görə, hansısa müəssisənin işçiləri ilə istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığortanın tətbiqi barədə müqavilənin bağlanmaması faktlarını aşkar edən kimi onlar haqqında müfəttişlər tərəfindən sığortanın bu növü üzrə xidmət göstərən sığorta şirkətlərinə məlumat verilir. Bundan sonra şirkət bu müəssisələrə öz xidmətlərini təqdim edir.
Əmək Müfəttişliyi rəhbərinin müavini deyib ki, monitorinqlərin ilkin nəticələrinə görə, yoxlamaların aparıldığı müəssisələrin böyük hissəsi öz işçilərini hələ də sığortalamayıblar.
Bir az əvvəl Məhərovun dediyi kimi, Azərbaycanda sığorta xidmətlərinin bu növünün tətbiqi sığorta müqaviləsinin tələbləri (texniki təhlükəsizlki qaydalarının tətbiqi tələbləri) üzündən istehsalatda bədbəxt hadisələrin sayını xeyli azaldacaq.
2010-cu ildə Azərbaycanda istehsalatda 69 nəfər (31 nəfəri tikinti sektorunda) həlak olub. 2010-cu ildə Azərbaycanda istehsalatda bədbəxt hadisələrin sayının azalması müşahidə olunur ki, bu da həm tikintinin həcminin azalması, həm də Əmək Müfəttişliyinin keçirdiyi tədbirlərlə bağlıdır.
2007-ci ildə Azərbaycanda 259 bədbəxt hadisəyə, 128 ölüm faktına, 202 müxtəlif növ xəsarət alma hallarına təsadüf edilib. 2008-ci ildə 255 bədbəxt hadisə, 79 ölüm faktı və 212 zədə alma, 2009-cu ildə isə 250 bədbəxt hadisə, 69 ölüm hadisəsi və 218 zədələnmə faktı qeydə alınıb.
Ümumdünya Əmək Təşkilatının məlumatına görə, hər il dünyada istehsalatda baş verən bədbəxt hadisələr nəticəsində 2,3 milyon insan həlak olur, bu rəqəmdən üç dəfə çox şəxs isə müxtəlif növ zədələr alır.
2010-cu ilin iyulunda Azərbaycan Prezidenti İlham Əliyev "İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında" qanunu təsdiq edib. Bu gün ölkədə həyat sığortası üzrə üç şirkət - "Atəşgah Həyat" və "Qala Həyat" , "Paşa Həyat" şirkətləri fəaliyyət göstərir.
