Azərbaycan, Bakı, 14 mart /Trend, müxbir Ü.İsmayılova/
Bakıda turizm xidmətlərinin göstərilməsinə xüsusi icazəsi (lisenziya) olmadan fəaliyyət göstərən bir sıra turizm şirkəti aşkarlanıb. Bu barədə bazar ertəsi Trend-ə Azərbaycan Turizm Assosiasiyasının (AzTA) rəhbəri Nahid Bağırov deyib.
Azərbaycan Mədəniyyət və Turizm Nazirliyinin məlumatına görə, ölkədə 207 turizm şirkəti fəaliyyət göstərir.
"Bakının 7 turizm şirkətində keçirilən monitorinqin yekunları üzrə assosiasiya Mədəniyyət və Turizm Nazirliyinə tövsiyələrini verib. Qərara əsasən, qeyri-qanuni işləyən şirkətlər bağlanıb", - Bağırov qeyd edib.
Onun sözlərinə görə, qeyri-qanuni fəaliyyət göstərən şirkətlərin aşkarlanması üzrə monitorinqlər davam etdirilir.
Bundan əvvəl Bağırovun dediyinə görə, monitorinqin predmeti şirkətlərdə göstərilən xidmətlərin keyfiyyəti, xüsusilə də turistlərin aldadılması hallarının mövcudluğu olacaq.
Bu monitorinq başa çatdıqdan sonra ölkə regionlarında turizm obyektlərinin monitorinqi aparılacaq. Turizm sahəsində xidmətlərin keyfiyyətinin yaxşılaşdırılması üzrə tədbirlər 2011-ci il "Turizm ili" çərçivəsində keçirilir.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb.
Assosiasiyanın əsas fəaliyyət istiqamətləri turizm şirkətlərinin maraqlarının qorunması, qanun layihələrinin işlənib hazırlanması, milli turizm şirkətinin yaradılmasına yardım, bazar iştirakçıları üçün təlim və seminarların keçirilməsi üzrə planın hazırlanması, Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması, daxili turizmin inkişafı və dünya bazarında turizm məhsullarının təqdim olunmasıdır.
Həmçinin, fəaliyyət istiqamətlərinə konqres turizminin inkişafı və tətbiqi, idarəetmə və xidmət sahəsində peşəkar kadrların hazırlanmasına yardım, turizm sahəsində adekvat vergi qoyuluşunun yaradılması və normativ nizamlamalar, standartlaşdırma, sertifikatlaşdırma və lisenziyalaşdırmanın inkişafına yardım, beynəlxalq turizm şirkətləri ilə əməkdaşlıq, rəsmi nəşriyyat orqanının yaradılması, hüquqi məsləhətləşmələr sahəsində xidmətlər, normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.