Azərbaycan, Bakı, 15 mart /Trend, müxbir Ü.İsmayılova/
Azərbaycanın Turizm Assosiasiyası 2011-ci ilin elan edildiyi "Turizm ili" çərçivəsində ölkənin turizm obyektlərində turizm xidmətləri üzrə qiymətlərin aşağı salınması haqqında təkliflə çıxış etmək fikrindədir. Bu barədə çərşənbə axşamı Azərbaycanın Turizm Assosiasiyasının (AZTA) rəhbəri Nahid Bağırov məlumat verib.
"Biz "Turizm ili" çərçivəsində ölkənin turizm obyektlərinə turizm axınının stimullaşdırılması məqsədilə hotel sahiblərinə belə güzəştlərin edilməsi barədə müraciət etmək fikrindəyik", - Bağırov deyib.
Onun sözlərinə görə, artıq bəzi turizm obyektləri 10 və daha çox adamdan ibarət turist qrupları üçün qiymətlərin 50 faizədək azaldılması barədə razılığa gəliblər.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. Ötən il Mehmanxanalar Assoasiyası ilə birləşib.
Assosiasiyanın əsas fəaliyyət istiqamətləri bunlardır: turizm şirkətlərinin maraqlarının qorunması; qanun layihələrinin, tövsiyələrin və qaydaların işlənməsi; milli turizm şirkətlərinin yaradılmasına kömək; bazar iştirakçıları üçün təlim və seminarların keçirilməsi planlarının hazırlanması; illik beynəlxalq sərgilərdə Azərbaycan turizminin potensial reklamı və təbliğatı üçün şərait yaradılması; daxili turizmin inkişafı və dünya bazarında turizm məhsullarının təqdimatı.
Həmçinin bu strukturun vəzifələrinə konqres turizminin inkişafı və tətbiqi; idarəetmə və xidmət sahəsində peşəkar kadrların hazırlanmasına kömək; turizm sahəsində adekvat vergiqoyma və normativ tənzimləmənin yaradılması; standartlaşmanın, sertifikatlaşmanın və lisenziyalaşdırmanın inkişafına kömək; beynəlxalq turiam şirkətləri ilə səmərəli əməkdaşlıq; rəsmi mətbu orqanın yaradılması; hüquq məsləhətləşmələri sahəsində xidmətlərin hazırlanması; normativ-hüquqi bazanın inkişafı çərçivəsində turizm şirkətlərinin hüquqlarının müdafiəsi sahəsində əməkdaşlıq da daxildir.