Azərbaycan, Bakı, 16 mart /Trend, müxbir Ü.İsmayılova/
2010-cu ildə Azərbaycanda 1 051 816 sığorta müqaviləsi bağlanıb. Trend-in məlumatına görə, bu barədə Azərbaycan Maliyyə Nazirliyi nəzdində Dövlət Sığorta Nəzarəti Xidmətinin rəhbəri Namiq Xəlilov "Azərbaycanın sığorta bazarı: problemlər və perspektivlər" konfransı zamanı deyib.
"Ötən il sığorta hadisələrinin sayı 100 792 olub", - Xəlilov qeyd edib.
Onun sözlərinə görə, 2010-cu ilin fəaliyyət yekunlarına görə şirkətlər 53 829 272 ödənişlə 155 586 415 manat sığorta haqqı yığıblar. Ötən il şəxsi sığorta şərtləri ilə həyat sığortası üzrə 16 189, tibbi sığorta üzrə - 63122 müqavilə, xaricə gedən şəxslərin sığortası üzrə - 64 939, bədbəxt hadisələrdən və xəstəliklərdən sığorta üzrə - 410 438 müqavilə bağlanıb.
Xəlilov bildirib ki, ötən il həmçinin əmlakın yanğından və başqa risklərdən sığortası üzrə 103 868, avtomobil vasitələrinin sığortalanması üzrə 48 937, yüklərin sığortası üzrə 59 094, avtomobil vasitələri sahiblərinin vətəndaş məsuliyyəti sığortası üzrə 391 989 müqavilə bağlanıb.
2010-cu ilin yekunlarına dair bir sığorta müqaviləsi üzrə orta məbləğ 148 manat, bir müqavilə üzrə orta ödəniş məbləği 534 manat təşkil edib.
Hazırda Azərbaycanda 28 sığorta və bir təkrar sığorta şirkəti, 17 sığorta agenti - hüquqi şəxs, 270 sığorta agenti - fiziki şəxs, hüquqi şəxslərin yeddi sığorta brokeri və fiziki şəxslərin altı sığorta brokeri fəaliyyət göstərir.
Biznes-sektorun nümayəndələrinin iştirak etdiyi konfransın təşkilatçıları qismində Azərbaycan Sığortaçılar Assosiasiyası və Maliyyə Nazirliyi çıxış edib.
Konfransda dünyada və Azərbaycanda sığorta sektorunun inkişaf perspektivləri, sığorta qanunvericiliyi, sığorta məhsulları və müqavilələr, həyat sığortasının inkişaf perspektivləri, risklərin idarə edilməsi sistemində sığortanın rolu müzakirə edilib.
Martın 16-na olan rəsmi məzənnə 0,7933 AZN/USD təşkil edir.
