Azərbaycan, Bakı, 17 mart /Trend, müxbir T.Cəfərov/
Azərbaycandan gündə 3000 turist İran Astarasına səfər edir. Bu sözləri Astara şəhərinin (İran) icra başçısı Keyvan Əsədpur deyib. Bu barədə Trend İranın FARS xəbər agentliyinə istinadən məlumat verir.
"Novruz bayramı günlərində turistlərin sayının ötən illə müqayisədə 20 faiz artacağı gözlənilir", - Əsədpur deyib.
O əlavə edib ki, Astara şəhərinə səfər edəcək qonaqların rifahını təmin etmək məqsədilə təcili tibbi yardım, yol polisi, polis, hotellər və turizim obyektləri tam hazır vəziyyətə gətirilib və qonaqları qarşılamağa hazırdır.
İran Azərbaycan vətəndaşları üçün viza rejimini birtərəfli qaydada ləğv edib və 2010-cu il fevralın 1-dən etibarən İrana gedən Azərbaycan vətəndaşlarından viza tələb olunmur.
Astara gömrük-buraxılış məntəqəsi vasitəsilə hər il 2 milyon ton məhsul daşınır və 500 min nəfərdən çox insan gedib-gəlir.
