Azərbaycan, Bakı, 18 mart /Trend, müxbir İ.Xəlilova/
Azərbaycan bankı "Paşa Bank" 2011-ci ildə xarici kapital bazarına çıxmaq barədə planları ilə əlaqədar bu il qiymətli kağzılarla əməliyyatlardan 5-6 faiz gəlir əldə edəcəyini gözləyir. Bu barədə Trend-ə bank xəzinəsinin rəhbəri Taleh Kazımov bildirib.
"Qərb emitentlərindən kağızların alqı-satqısı üzrə əməliyyatlar sayəsində ümumilikdə 5-6 faizə yaxın illik gəlirlilik gözlənilir. Hərçənd Rusiya və MDB-dən emitentlərin qiymətli kağızları üzrə gəlirlilik 7-8 faiz civarında dəyişə bilər. İnvestisiya qoyuluşları vaxtı yüksək reytinq nəzərə alınacaq", - Kazımov bildirib.
Onun sözlərinə görə, yüksək likvidliyə baxmayaraq, Azərbaycanda qiymətli kağızlar bazarı çox zəif formalaşıb. Ona görə də Azərbaycanda əsasən dövlət istiqrazlarından ibarət olan qiymətli kağızlar portfelinin gəlirliliyi 4-4,5 faizə yaxın təşkil edir.
Bu gün bankın investisiya portfeli 156 milyon manat və ya qiymətli kağızların qoyulduğu aktivlərin, daha doğrusu, ipoteka kağızlarının, Maliyyə Nazirliyinin dövlət istiqrazlarının, Mərkəzi Bankın notlarının, repo-əməliyyatların 31 faizindən ibarətdir. Ümumi portfeldən təxminən 35 milyon manat ipoteka istiqrazlarının payına düşür.
"Azərbaycanda koprorativ istiqrazlar çox az buraxılır və bu portfelin gəlirliliyi bir qədər aşağıdır, ona görə də bu kağızlara qiymətli kağızların ümumi portfelindən 9 faiz qoyulur, - Kazımov deyib. - Bunlar lizinq, İT şirkətlərinin istiqrazlarıdır".
Bu vəziyyəti və Azərbaycanın qiymətli kağızları üzrə gəlirliliyin aşağı olduğunu anlayan "Paşa Bank" öz portfelini şaxələndirməyi planlaşdırır.
"İlk növbədə, biz xarici dövlətlərin suveren istiqrazlarına, o cümlədən Rusiya, Ukrayna və Mərkəzi Avropa ölkələrinin şirkətlərinin istiqrazlarına sərmayə qoymağa maraq göstəririk. İnvestisiyalar qismən Şimali Amerikada emitentlərin qiymətli kağızlarına qoyula bilər, lakin ilkin mərhələdə onlar dövlət kağızları, onların Federal Ehtiyat Sisteminin kağızları ola bilər, - Kazımov bildirib. - Biz bu istiqamətdə işləri aktivləşdirmək fikrindəyik və hazırda yeni qaydalar hazırlanır".
"Paşa Bank" 2007-ci ilin iyununda təsis edilib və 2007-ci il yanvarın 28-dən Mərkəzi Bankın lisenziyası əsasında fəaliyyət göstərir.
"Paşa Bank" "Paşa Insurance", "Paşa Life", "Paşa Travel" və "Paşa Construction"la birgə klassik holdinq deyil, faktiki investisiya şirkəti olan "Paşa Holdinq"in tərkibinə daxildir.
Bankın səhmdarları strukturunda pay bölgüsü aşağıdakı kimidir: "Paşa Holdinq"ə səhmlərin 60, "ADOR ltd" şirkətinə 30, Arif Paşayevə isə 10 faizi məxsusdur.
Martın 18-nə olan rəsmi məzənnə 0,7932 AZN/USD təşkil edir.
