2010-cu ildə Azərbaycanda bağlanan auditor müqavilələrinin orta dəyəri 43 faiz artıb

Azərbaycan, Bakı, 29 mart /Trend, müxbir Ü.İsmayılova/

2010-cu ildə Azərbaycanda yerli auditorlar ölkə ərazisində fəaliyyət göstərən müəssisələrlə ümumi məbləği 30,902 milyon manat olan 3 530 müqavilə bağlayıblar. Trend-in məlumatına görə, bu barədə Auditorlar Palatasının 2010-cu ilin fəaliyyət yekunları üzrə hesabatında deyilir. Həmin müqavilələrin 9 832 308,40 manat məbləğində 629-u ilin əvvəlinə qalıq kimi, 21 295 610,60 manat məbləğində 2 902-i isə hesabat dövründə bağlanıb.

Bağlanmış müqavilələrin xüsusi çəkisi xarici auditor təşkilatlarının filial və ya nümayəndəlikləri üzrə sayına görə 6,1% və məbləğinə görə 36,7%, xarici investisiyalı auditor təşkilatları üzrə sayına görə 6,5% və məbləğinə görə 30,8%, yerli auditor təşkilatları üzrə sayına görə 39,6% və məbləğinə görə 26,7%, sərbəst auditorlar üzrə sayına görə 47,8% və məbləğinə görə 5,8% təşkil edib.

2009-cu il ilə müqayisədə 2010-cu ildə bağlanmış müqavilələrin sayı 791 ədəd və ya 18,3%, məbləği isə 1 820 412,70 manat və ya 5,6% azalıb.

2010-cu il ərzində bağlanmış müqavilələrdən 2 553 686,60 manat məbləğində 2 831-i yerinə yetirilib.

2010-cu il üzrə 2009-cu il ilə müqayisədə yerinə yetirilmiş müqavilələrin sayı 921 ədəd və ya 24,5% azalıb, məbləği isə 1 881 060,80 manat və ya 7,4% artıb, orta məbləğ isə 6 304,80 manatdan 9 020,40 manata qədər, yəni 2 715,60 manat və ya 43,1% artıb.

2010-cu ildə Azərbaycan Auditorlar Palatasının gəlirləri cəmi 433,473 min manat təşkil edib, o cümlədən üzvlük haqlarından 407,208 min manat, imtahanlarda iştirak üçün ödənişlərə görə 4,7 min manat, audit sahəsində dərc edilən materiallarla bağlı satışdan və abonent ödənişindən 3,520 min manat, kurslara qəbuldan 11,810 min manat, üzv müxbirlərin üzvlük haqlarından 1,078 min manat, kənardan köməkdən 5,156 min manat olub. Azərbaycan Auditorlar Palatasının gəlirləri 2009-cu illə müqayisədə 0,4 faiz (43,517 min manat) azalıb.

Ötən il Azərbaycan Auditorlar Palatası dövlət büdcəsinə 26,827 min manat, Dövlət Sosial Müdafiə Fonduna 53,086 min manat ödəyib. Ötən il palatanın ştatı 64 əməkdaşdan ibarət olub, il ərzində bütün əməkdaşların əməkhaqqısı 197,130 min manat təşkil edib.

Ötən il palatanın xərcləri 431,073 min manat təşkil edib. Azərbaycan Auditorlar Palatası 2010-cu ili 2 400,30 manatlıq gəlirlə başa vurub.

Müqayisəli cədvəldə Azərbaycan Auditorlar Palatasının maliyyə göstəriciləri göstərilib:

2010-cu ildə Azərbaycan Auditorlar Palatası auditor xidmətlərinin göstərilməsi üçün 14 fiziki və 9 hüquqi şəxsə lisenziya verib. Ötən il auditor xidməti göstərən 12 fiziki və 3 hüquqi şəxsin lisenziyasının qüvvədəolma müddəti uzadılıb. Azərbaycan Auditorlar Palatasının hesabatında deyilir ki, 2010-cu il yanvarın 1-nə olan vəziyyətə görə, ölkədə auditor xidmətlərinin göstərilməsi üçün 108 fiziki şəxs lisenziyaya malik olub. Onlardan 39 nəfəri müstəqil auditor kimi, 68 auditor isə 48 auditor şirkətində fəaliyyət göstərib. 2010-cu il ərzində 40 müstəqil auditor, 48 şirkət (o cümlədən 4 xarici şirkət nümayəndəliyi) və 3 xarici investisiyalı şirkət fəaliyyət hesabatlarını təqdim ediblər.

Martın 29-na olan rəsmi məzənnə 0,7929 AZN/USD təşkil edir.