Azərbaycan, Bakı, 8 aprel /Trend, müxbir İ.Xəlilova/
Hesablamalara görə, Azərbaycanda daşınmaz əmlakın icbari sığortasının tətbiqi ilə illik daxilolmalar 50 milyon manat təşkil edə bilər. Trend-in məlumatına görə, bu barədə cümə günü parlamentin İqtisadi siyasət komitəsinin sədri Ziyad Səmədzadə Milli Məclisin plenar iclasında "Sığortanın icbari növləri haqqında" qanun layihəsinin ikinci oxunuşu zamanı deyib.
"Bu, o qədər də böyük məbləğ deyil və ölkə əhalisi nəzərə alınmaqla adambaşına 5-6 manat düşür, - Səmədzadə qeyd edib. - Daşınmaz əmlakın icbari sığortasının tətbiqi Azərbaycanda adambaşına düşən sığorta yığımlarını 25 manatadək artırmağa imkan verəcək".
Qanun layihəsinin son redaksiyasına əsasən, mənzilin qiymətindən asılı olmayaraq Bakı üçün 25 min manat səviyyəsində məbləğin tətbiq edilməsi barədə qərar qəbul edilib, azadolma məbləği isə 250 manat səviyyəsində müəyyənləşdirilib. Sumqayıt, Gəncə və Naxçıvan şəhərləri üçün sığorta məbləği 200 manat azadolma məbləği ilə 20 min manat, qalan regionlar üçün 15 min manat (150 manat) səviyyəsində təşkil edir.
Qanun layihəsinin əvvəlki variantında nəzərdə tutulmuşdu ki, daşınmaz əmlak sığorta olunan zaman sığorta məbləği mənzilin bərpasına çəkiləcək xərclərin dəyəri əsasında hesablanır.
"Düzəlişlərə əsasən, sığortanın bu növü üzrə 0,2 faizlik sığorta tarifi ilə paytaxt sakinləri üçün sığorta haqqı 50 manat təşkil edəcək, sığorta ödənişinin böyük məbləğinə ümid edənlər isə əmlakın könüllü sığorta polisini almaq imkanını əldə edirlər, bu isə sığortanın bu istiqamətinin də inkişafına imkan verəcək, - Səmədzadə əlavə edib. - Bütün bu mərhələlərdən keçən ABŞ, Almaniya, Norveç elə səviyyəyə çatıb ki, sığorta bazarı artıq ikinci investisiya mənbəyinə çevrilib".
Onun sözlərinə görə, hazırda icraedici orqanla təqaüdçülər, şəhid ailələri və əhalinin digər aztəminatlı təbəqələrinin marağı nəzərə alınmaqla, daşınmaz əmlakın sığortalanması mexanizmi də müzakirə edilir.
Səmədzadə Maliyyə Nazirliyinə sığorta şirkətləri üzərində nəzarəti gücləndirmək və onların fəaliyyətində şəffaflığı təmin etmək xahişi ilə müraciət edib.
"İki il əvvəl sığorta şirkətlərinin kapitallaşdırmağa yönəltdikləri gəlirlər vergiqoymadan azad edilib, bu isə o zaman üçün vacib olub. Lakin yeni qanunun tətbiqi ilə oyunun yeni qaydaları yaranacaq", - o bildirib.
Müzakirələr zamanı bir sıra deputatlar bu qanunun tətbiqinə başlamaqla daşınmaz əmlakın icbari sığortasına icazəni məhz əmlakın könüllü sığortası sahəsində 10 ildən çox təcrübəyə, müvafiq maddi-texniki baza və resursa malik şirkətlərə vermək təkilifi ilə çıxış ediblər.
Qanun layihəsinə əsasən, daşınmaz əmlakın icbari sığortası fiziki şəxslərə məxsus bütün növ tikililərə, yaşayış evlərinə, hüquqi şəxslərin ofislərinə və dövlət əmlakına aid olacaq. Bununla yanaşı, yanğın, partlayış, tufan, elektrik şəbəkəsində qısa qapanma, kanalizasiya və ya su kəməri sistemində qəzalar, təbii kataklizmlər və s. nəticəsində əmlaka dəyən ziyanlar hesab ediləcək.
Hazırda Azərbaycanda icbari sığortanın 10 növü tətbiq edilir. Lakin icbari sığorta üzrə yığımların ümumi həcmi bazardakı sığorta haqlarının ümumi həcminin 20 faizini təşkil edir. Bu isə aşağı göstəricidir və icbari sığorta sahəsində qanunvericiliyin təkmilləşdirilməsi zərurətindən xəbər verir.
Aprelin 8-nə olan rəsmi məzənnə 0,7923 AZN/USD təşkil edir.