Azərbaycan, Bakı, 14 aprel /Trend, müxbir N.İsmayılova/
Azərbaycan bankı "Texnika Bank" 2011-ci ilin yekunları üzrə aktivlərin 30 faizlik artımını gözləyir. Bu barədə bankın idarə heyətinin sədri Samir Hüseynov deyib.
"2006-2007-ci illərdə bankın aktivləri üçrəqəmli templərlə artıb, son 2-3 ildə biz institutsional inkişafa diqqətimizi cəmləmişik və aktivlərin artımı 10 faizdən 15 faizədək olub, indi biz artımın ikinci dalğasına hazırıq və ilin yekunları üzrə aktivlərin 30 faiz səviyyəsində artımını gözləyirik", - o bildirib.
Hüseynovun sözlərinə görə, 2011-ci ilin sonuna bankın aktivləri 650 milyon manat səviyyəyəsinə çata bilər.
"2011-ci il aprelin 1-nə "Texnika Bank"ın aktivləri 545,6 milyon manat təşkil edərək ilin birinci rübü ərzində 7,82 faiz, ötən ilin müvafiq dövrü ilə müqayisədə 20,55 fazi artıb", - bankdan bildirilib.
"Texnikabank" bank bazarında 1993-cü ildən fəaliyyət göstərir və 2007-ci ilədək 100 faiz Azərbaycan bankı olub. Bu gün bankın majoritar səhmdarı kimi "World Wines" şirkəti çıxış edir. Şirkət bankın səhmlərinin 75 faizinə sahibdir. Bankın Müşahidə Şurasının sədri Etibar Əliyev səhmlərin 15 faizinə, ABŞ-ın "Kazimir Investment Caspian Fund" holdinqi isə səhmlərin 10 faizinə nəzarət edir.
