Azərbaycan, Bakı, 14 aprel /Trend/
İranın Nazirlər Kabinetinin təsdiq etdiyi yeni qanuna əsasən, bu ölkədə yaşayan əcnəbi vətəndaşlar və onların ailə üzvləri ölkə daxilində fəaliyyət göstərən sığorta şirkətlərinin birində qanuna uyğun formada qəza və xəstəliklərdən icbari sığortalanmalıdır. Bu barədə Trend İran televiziyasının rəsmi xəbər saytı iribnews.ir-ə istinadən məlumat verir.
Məlumata görə, İran Xarici İşlər Nazirliyi üç ay müddətinə ölkənin Səhiyyə Nazirliyi, Sosial Müdafiə Nazirliyi və İranın Mərkəzi Sığorta Şirkəti ilə yeni qanunun icrası məqsədilə beynəlxalq standartlara uyğun şəkildə birgə icra təlimatı hazırlamaldır.
Yeni qanuna əsasən, İranda qəza və xəstəliklərdən sığortalanmayan şəxslərin qalması qadağan olunur. Həmçinin, Nazirlər Kabinetinin təsdiq etdiyi qanunda göstərilir ki, İrana səfər etmək üçün viza almaq istəyən əcnəbi vətəndaşlar da qəza və xəstəliklərdən icbari sığortalanmalıdır. Əks təqdirdə onlara viza verilməyəcək.