...

Azərbaycanda bank və sığortaçılar üçün vergi güzəştlərinin müddətinin uzadılması planlaşdırılır

Biznes və iqtisadiyyat xəbərləri Materials 15 Aprel 2011 15:20 (UTC +04:00)

Azərbaycan, Bakı, 15 aprel /Trend, müxbir İ.Xəlilova/

Azərbaycan hökuməti ölkənin bank və sığorta şirkətlərinə kapitallaşdırmanın artırılmasının stimullaşdırılması məqsədilə təqdim edilən qüvvədə olan vergi güzəştlərinin müddətini uzatmağı planlaşdırır.

2009-cu il yanvarın 1-dən banklar, sığorta və təkrar sığorta şirkətləri 3 il müddətinə kapitallaşmaya yönəldilən mənfəət vergisinin ödənişindən azad ediliblər. Bu güzəştlərin işləmə müddəti 2011-ci ildə başa çatır.

Cümə günü ölkə hökumətindən bildirilib ki, hazırda bu güzəştlərin müddətinin daha üç il uzadılmasını nəzərdə tutan qanun layihəsi baxılmaq üçün hökumətə təqdim edilib.

Bu addım ölkənin maliyyə sektoruna, bank və sığorta xidmətlərinin keyfiyyətinin yaxşılaşdırılmasına, bankların, sığorta və təkrar sığorta şirkətlərinin rəqabət qabiliyyətliliyinin möhkəmlənməsinə, onların kapitallaşdırılmasının artırılmasına yönəlib.

Həyata keçirilən bu tədbirlər nəticəsində həmin güzəştlərin qüvvədə olduğu bir il ərzində sığorta şirkətləri və banklar kapitallaşmaya 145 milyon manat vəsait yönəldiblər. 2009-cu ildə Azərbaycandakı bütün sığorta şirkətlərinin məcmu nizamnamə kapitalı 8 faiz artaraq 89,8 milyon manat, banklarınkı isə 17,6 faiz artaraq 2004,98 milyon manat təşkil edib.

2010-cu ilin yekunları üzrə Azərbaycanda fəaliyyət göstərən sığorta şirkətlərinin məcmu kapitalı 153,6 milyon manat təşkil edib ki, bu da 2009-cu ilin göstəricisindən 48,5 milyon manat və ya 46 faiz çoxdur.

Bütün ötən il ərzində banklar kapitallarını 8,2 faiz artırıblar ki, bunun da nəticəsində onun həcmi 2169,12 milyon manat olub.

2010-cu ilin sonunda ölkədə 27 sığorta şirkəti (habelə xarici kapitalın iştirakı ilə beş), bir təkrar sığorta və altı broker şirkəti (o cümlədən xarici kapitalın iştirakı ilə beş) fəaliyyət göstərib.

Hesabat dövründə respublika ərazisində bank fəaliyyəti göstərmək üçün lisenziyaya 45 bank malik olub, ötən il iki bank bağlanıb. Bu gün ölkədə xarici kapitalın iştirakı ilə 22 bank fəaliyyət göstərir. Onlardan yeddisinin xarici kapitalının xüsusi çəkisi 50 faizlə 100 faiz arasında, 13 bankın isə 50 faizədək formalaşıb. Habelə ölkədə xarici bankların iki yerli filialı fəaliyyət göstərir.

Xaricdə fəaliyyət göstərən bank strukturlarının sayı səkkizdir. Onlardan beşi nümayəndəlik, ikisi törəmə bank, biri filialdır. Azərbaycanda həmçinin xarici bankların beş nümayəndəliyi fəaliyyət göstərir.

Maliyyə Nazirliyi sığorta şirkətlərinin kapitallaşması üçün cədvəl müəyyən edib. 2010-cu il noyabrın 29-da həmin cədvəldə sığorta və təkrar sığorta şirkətlərinin minimum kapitala tələbləri yumşaldılıb.

Ümumi cədvəldə kapitallaşma üzrə minimum tələblər yeni cədvələ uyğun göstərilib:

Kapitalın minimum tələblərinin təmin olunma müddəti

Sığorta şirkətlərinin kapitalının minimum səviyyəsi

Təkrar sığorta şirkətlərinin kapitalının minimum səviyyəsi

01.01.2011

3 mln. manat

6 mln. manat

01.01.2012

4 mln. manat

8 mln. manat

01.01.2013

5 mln. manat

10 mln. manat

Sığortaçılardan fərqli olaraq, bankların minimum kapitallaşma tələbləri bir neçə il ərzində 10 milyon manat səviyyəsində saxlanıb. Dünya maliyyə böhranı nəticəsində yer alan itkilərin yerini doldurmaq məqsədilə Mərkəzi Bank hər bir bankla çərçivə sazişi imzalayıb və hazırlanan proqramlara uyğun olaraq il ərzində bankların kapitallaşması prosesi davam edib. Mərkəzi Bank gələcək risklər nəzərə alınmaqla, bankların səhmdarları qarşısında kapitalın artırılması məqsədini qoyub.

Aprelin 15-nə olan rəsmi məzənnə 0,7927 AZN/USD təşkil edir.

Xəbər lenti

Xəbər lenti