Azərbaycan, Bakı, 18 aprel /Trend, müxbir İ.Xəlilova/
Azərbaycanda nağdsız hesablaşmaların stimullaşdırılması üzrə təkliflər paketi artıq ölkə hökumətinə təqdim edilib. Trend-in məlumatına görə, bu barədə vergilər nazirinin müavini Natiq Əmirov deyib.
"Birgə işçi qrupu artıq təklifləri hazırlayaraq Nazirlər Kabinetinə və Prezident Administrasiyasına təqdim edib", - nazir müavini bildirib.
Təkliflərin mahiyyəti ondan ibarətdir ki, ölkədə nağd hesablaşmaların həcmi minimallaşdırılsın və imkan daxilində onların maksimum nağdsız qarşılıqlı ödənişinə, daha doğrusu, bank platformasına keçilsin.
"Bunun üçün təkliflərdə həm stimullaşdırıcı, həm də inzibati tədbirlər nəzərdə tutulub", - nazir müavini bildirib.
Onu sözlərinə görə, əvvəlcə nağdsız dövriyyənin artırılması təmin olunacaq, tədbirlərin reallaşdırıldığı birinci ilin monitorinqindən sonra müəyyən sahələrdə güzəştlərin tətbiqi mümkün olacaq.
Tədbirlər paketinə təxminən 8-10 tədbir daxil edilib. Onlar qanunvericilik aktlarına əlavə və dəyişiklikləri nəzərdə tutur.
"Təkliflər çərçivəsində vergiödəyicilər, eləcə də banklar üçün güzəştlər nəzərdə tutulub", - nazir müavini bildirib.
Nağdsız hesablaşmaların stimullaşdırılması üçün Vergilər Nazirliyi və Mərkəzi Bankın əməkdaşlarından ibarət işçi qrupu yaradılıb. Həmin qrup ticarət sahəsində nağdsız hesablaşmaların həcminin artırılması üçün təkliflərin hazırlanması ilə məşğuldur. Respublikada nağdsız hesablaşmaların stimullaşdırılması üzrə təkliflər sırasında vergiödəyicilər üçün malların və xidmətlərin haqqının plastik kartlar vasitəsilə ödənilməsi üçün imkan yaradan vergi güzəştləri, eləcə də alıcılar üçün stimullaşdırıcı lotereyalar yer ala bilər.
Nağdsız hesablaşmaların stimullaşdırılması şəffaflığın artırılmasına və bank sektorunun inkişafına yardım edəcək.