Azərbaycan, Bakı, 20 aprel /Trend, müxbir N.İsmayılova/
Dünya Bankının (DB) Direktorlar Şurası aprelin 26-da Azərbaycanın irriqasiya sisteminin paylanması və idarə olunması sisteminin təkmilləşdirilməsi üzrə üçüncü krediti təsdiq edib. Bu barədə çərşənbə günü Trend-ə bankın Bakı nümayəndəliyindən məlumat verilib.
Bundan əvvəl Dünya Bankının Direktorlar Şurası kreditin təsdiqlənməsi müddətini aprelin 19-na planlaşdırmışdı.
Layihənin ümumi dəyəri 114 milyon dollar təşkil edir. Onun 76,8 milyon dollarının BİA-nın güzəştli maliyyələşdirməsindən, 3,2 milyon dollarının isə Beynəlxalq Yenidənqurma və İnkişaf Bankının şərtləri ilə verilməsi planlaşdırılır, layihənin 34 milyon dollarlıq hissəsi isə dövlət vəsaitləri hesabına maliyyələşdiriləcək.
Həyata keçirilməsinə 2003-cü ildən başlanan Azərbaycanda süni suvarma sistemlərinin paylaşdırılması və idarə olunması sisteminin təkmilləşdirilməsi üzrə layihənin müsbət nəticələri onun əhatə zonasının genişləndirilməsi istəyini yaradıb. Bununla əlaqədar ölkə hökuməti DB-yə yeni süni suvarma layihəsinin maliyyələşdirilməsi ilə bağlı xahişlə müraciət edib. Oraya Azərbaycanın 33 rayonu cəlb olunacaq.
Birinci layihənin həyata keçirilməsi nəticəsində 11 rayonda 22 Sudan istifadəedənlər Assosiasiyası yaradılıb. Layihə 56 min hektar [yeni layihə 100 min hektarı əhatə edir] ərazinin suvarma sisteminin yaxşılaşdırılmasına imkan verib və 100 min fermeri əhatə edib. Layihənin 23 faiz yerinə yetirilməsindən sonra həmin ərazidə məhsuldarlıq artıb. Bu zaman bir hektar əraziyə çəkilən xərclər 450 dollar təşkil edib. Layihənin ümumi dəyəri 43 milyon dollar təşkil edir ki, bunun 39 milyon dolları DB vəsaitləri hesabına maliyyələşdiriləcək, 4 milyon dollar isə Azərbaycan hökumətinin payı təşkil edir.
Bundan əvvəl bank ölkənin süni suvarma-drenaj sisteminin bərpasına 42 milyon dollar ayırıb. Layihənin ümumi dəyəri 46,86 milyon dollardır. Layihə Samur-Abşeron kanalı boyunca 86 min hektar və Mil-Muğan kollektoru kənarındakı suvarılan 36,5 min hektar ərazini əhatə edir.
