Azərbaycan, Bakı, 24 may /Trend, müxbir A.Axundov/
"Azərbaycan Respublikasının 2011-ci il dövlət büdcəsi haqqında" qanunda dəyişikliklərin edilməsi barədə" qanun layihəsində ölkənin ÜDM-də dövlət büdcəsinin kəsirinin xüsusi çəkisinin 1,7 faizdən 0,9 faizədək, dövlət büdcəsinin gəlirlərinə nisbətdə isə 5,7 faizdən 2,5 faizədək azaldılması təklif olunur. Trend-in məlumatına görə, bu barədə Hesablama Palatasının qanun layihəsi haqqındakı rəyində deyilir.
Ddövlət büdcəsinin son həddi 2011-ci ildə nəzərdə tutulan 687 milyon manata nisbətdə 387 milyon manat həcmində müəyyən edilib.
Bazar ertəsi Azərbaycan Milli Məclisinin İqtisadi siyasət və Sosial siyasət komitələri "Azərbaycan Respublikasının 2011-ci il dövlət büdcəsi haqqında" qanunda dəyişikliklərin edilməsi barədə" qanun layihəsini ölkə parlamentində mayın 27-də gözlənilən müzakirələrə təqdim edib.
Rəyə görə, 2011-ci il dövlət büdcəsinin düzəlişlər edilmiş layihəsində büdcə kəsirinin maliyyələşdirilməsinin özəlləşdirilmədən (35 milyon manat), daxili və xarici borclardan daxilolmalar, eləcə də qiymətli kağızların yerləşdirilməsi (200 milyon manat), dövlət büdcəsindən maliyyələşdirilən təşkilatların göstərdikləri pullu xidmətlərdən daxil olan vəsaitlər (152 milyon manat), həmçinin, 2011-ci il yanvarın 1-nə dövlət büdcəsinin vahid xəzinədarlıq hesabındakı qalıq (703,4 min manat) hesabına həyata keçirilməsi planlaşdırılır.
