Azərbaycan, Bakı, 9 iyun /Trend, müxbir N.İsmayılova/
2011-ci ilin aprel ayı ərzində Azərbaycanın bank sektorunun kapitallaşdırılması 0,3 faiz, 2010-cu ilin aprelinə nisbətdə 9,2 faiz artaraq mayın 1-nə 2213,2 milyon manat təşkil edib. Bu barədə cümə axşamı Trend-ə Azərbaycan Mərkəzi Bankından bildiriblər.
AMB-nin statistik məlumatlarına görə, kapitalı 10 milyon manatı ötən bankların sayı aprel ayının yekunları üzrə 41 ədəd təşkil edərək 2010-cu ilin sonu ilə müqayisədə 1 bank azalıb, 2011-ci ilin martı ilə müqayisədə isə dəyişməz qalıb. Apreldə bu kateqoriyalı bankların ölkənin bütün banklarının ümumi həcmində xüsusi çəkisi mart və ilin əvvəlində olduğu kimi 98,9 faiz təşkil edib.
Bankın ikisində (0,9 faiz xüsusi çəki ilə) kapital 5 milyon və 10 milyon manat arasında, bankın birində isə (0,2 faiz) 3,5 milyon manatdan 5 milyon manatadək formalaşıb.
İyunun 9-na olan rəsmi məzənnə 0,7887 AZN/USD təşkil edir.