Azərbaycan, Bakı, 17 iyun /Trend, müxbir A.Axundov/
Azərbaycan 2011-ci ildə 2,5 milyon ton taxıl istehsal ediləcəyini gözləyir. Bu, ötən ilin göstəricisini 500 min ton üstələyir. Bu barədə cümə günü jurnalsitlərə kənd təsərrüfatı naziri İsmət Abasov deyib.
"Hava şəraiti əlverişli olsa, biz 2,5 milyon ton taxıl istehsalını proqnozlaşdırırıq. Bunun 1,7 milyonu ərzaq buğdasının payına düşəcək", - Abasov qeyd edib.
2011-ci ildə 800 min ton arpa istehsalı planlaşdırılır.
Ötən il ərzində ölkədə 2000,9 min ton taxıl yığılıb. Bu, 2009-cu ildəkindən 33 faiz azdır. Hər bir hektar torpaqdan orta hesabla 20,7 sentner taxıl yığılıb.
Nazirin sözlərinə görə, bu gün ölkənin taxıla tələbatı 3-3,2 milyon tondur.
"Çatışmayan hissə digər ölkələrdən idxal ediləcək. Bu gün Azərbaycan taxılı Rusiya və Qazaxıstandan idxal edir", - nazir qeyd edib.
Onun sözlərinə görə, ötən il Azərbaycanda əlverişsiz hava şəraitinə görə taxıl istehsalının həcminin azalmasına baxmayaraq, ölkədə məhsulun bu növü üzrə qıtlıq müşahidə edilmir.
"Digər kənd təsərrüfatı məhsulları kimi, taxıla tələbat da bu il tam ödəniləcək", - Abasov əlavə edib.
Kənd təsərrüfatı nazirinin müavini Bəhram Əliyevin sözlərinə görə, hazırda 945 min hektar ərazidə taxıl səpilib. 660 min hektarda buğda, 285 min hektarda arpa əkilib. 2010-cu ildə taxıl bitkilərinin əkin sahəsi 966,7 min hektar olub.
Ölkədə yaz əkin işləri sona çatmaq üzrədir və iyunun 1-nə 376,3 min hektar ərazidə yaz bitkiləri əkilib. Ötən illə müqayisədə əkin sahəsi 6,7 faiz və ya 23,8 min hektar artıb.
