Azərbaycan, Bakı, 23 iyun /Trend, müxbir A.Axundov/
Azərbaycan Sığortaçılar Assosiasiyası (ASA) cümə axşamı keçirilən Müşahidə Şurasının iclasında tibbi sığorta sahəsində tövsiyələrə baxıb və onları təsdiqləyib.
"Tövsiyə məktubu sığorta şirkətlərinə paylanacaq, sonra mətbuatda dərc olunacaq", - bu barədə Trend-ə iclasdan sonra ASA-nın icraçı direktoru Azər Əliyev məlumat verib.
Onun sözlərinə görə, assosiasiya tərəfindən həm potensial müştərilər, həm də sığortaçıların özləri üçün tövsiyələr hazırlanıb. Bu tövsiyələrin məqsədi tibbi sığortada işlərin real vəziyyətinin kütləyə çatdırılmasıdır.
"Tövsiyələr A-Qroup SŞ-nin nümayəndəsinin rəhbərlik etdiyi Könüllü Tibbi Sığorta Komitəsi tərəfindən hazırlanıb", - Əliyev deyib.
Azərbaycanda "İcbari sığorta haqqında" qanun 1999-cu ildə qəbul edilib. 2009-cu ilin dekabrında Azərbaycan Nazirlər Kabineti yanında İcbari Tibbi Sığorta üzrə Dövlət Agentliyi yaradılıb. Tibbi sığorta sisteminin yaradılması səhiyyə sistemində islahatların aparılması, tibbi xidmətlərin keyfiyyətinin yaxşılaşdırılması çərçivəsində həyata keçirilir. Bu sistemin tətbiqi üçün dövlət büdcəsindən illik vəsait ayrılır, lakin hələlik o, pilot rayon kimi seçilən Siyəzən rayonunda sınaqdan keçirilir.
Bir müddət əvvəl maliyyə nazirinin müavini Azər Bayramovun dediyi kimi, Azərbaycanda tibbi sığortanın inkişafı səhiyyə sistemində ciddi islahatlarla müşayiət edilməlidir.
"Tibbi sığorta çox mühüm məsələdir, lakin ilkin olaraq səhiyyə sistemində iş prinsipi və maliyyələşdirmə dəyişdirilməlidir, - Bayramov bildirib. - Bu halda biz büdcə maliyyələşdirməsindən tibbi sığorta sisteminə tam keçməliyik. Buna uyğun olaraq sistem özü buna hazır olmalıdır".
Azərbaycan Almaniya, Niderland, Norveç və Rusiyada bu mexanizmdən istifadənin təcrübəsini öyrənib.
Tibbi sığorta icbari və könüllü formada həyata keçirilir. İcbari tibbi sığorta dövlət sosial sığortanın tərkib hissəsi olmaqla əhalinin tibbi və dərman yardımını icbari tibbi sığorta proqramına uyğun həcmdə almasını təmin edir. Könüllü tibbi sığorta icbari tibbi sığorta proqramında müəyyən edilənlə yanaşı, əhalini tibbi və digər xidmətlərlə könüllü tibbi sığorta haqqında müqavilə əsasında təmin edir.
Maliyyə Nazirliyi yanında Dövlət Sığorta Nəzarəti Xidmətinin məlumatına görə, 2011-ci ilin ilk beş ayı ərzində Azərbaycandakı sığorta şirkətləri tərəfindən könüllü tibbi sığorta üzrə 16,03 milyon manat (yığımların ümumi həcminin 18,54 faizi) sığorta haqqı yığılıb, ödənişlər isə 7,44 milyon manat (ödənişlərin ümumi həcminin 33,51 faizi) olub.
İyunun 23-nə olan rəsmi məzənnə 0,7871 AZN/USD təşkil edir.
