Azərbaycan, Bakı, 30 iyun /Trend, müxbir A.Axundov/
20 il ərzində Azərbaycan əhalisinin real gəlirləri 2,4 dəfə artıb. Trend-in məlumatına görə, bu barədə Dövlət Statistika Komitəsinin sədri Arif Vəliyev "Müstəqil Azərbaycanın inkişafı rəqəmlərdə" mövzusunda elmi simpoziumda çıxışı zamanı deyib.
"1995-ci illə müqayisədə Azərbaycan əhalisinin real gəlirləri 8,2 dəfə artıb və 2010-cu ilin sonuna adambaşına 2 866 manat təşkil edib", - Vəliyev bildirib.
Onun sözlərinə görə, 1995-2010-cu illər ərzində orta aylıq əməkhaqqı 26,5 dəfə artaraq 331,5 manat təşkil edib.
"Bununla yanaşı, 2010-cu ilin sonuna Azərbaycan bankları tərəfindən verilən kreditlərin həcmi 2000-ci illə müqayisədə 20 dəfə artıb. Bu müddət ərzində Azərbaycan manatı möhkəmlənib, onun etibarlılığı artıb", - Vəliyev bildirib.
Komitə sədrinin sözlərinə görə, nəticədə Azərbaycanda milli valyutada bank əmanətlərinin xüsusi çəkisi 1993-cü ildəki 8 faizdən 2010-cu ildə 46,5 faizədək artıb.
"2011-ci il yanvarın 1-nə əhalinin banklardakı əmanətləri üç milyard manatı ötüb", - Vəliyev bildirib.
İyunun 30-na olan rəsmi məzənnə 0,7867 AZN/USD təşkil edir.