Azərbaycan, Bakı, 25 iyul /Trend, müxbir V.Javoronkova/
Özbəkistan Azərbaycanı stabil taxıl tədarükü ilə təmin etməyə hazırdır. Bu barədə Trend-ə Özbəkistan Xarici İqtisadi Əlaqələr, İnvestisiya və Ticarət Nazirliyinin mətbuat xidmətindən deyiblər.
"Azərbaycan özbək taxılının ən iri idxalçılarından biridir və Özbəkistan gələcəkdə də bu ölkəyə stabil taxıl tədarükünə hazırdır", - məlumatda deyilir.
Özbəkistan Kənd və Su Təsərrüfatı Nazirliyinin məlumatına görə, özbək taxılçılar 2011-ci ildə 6,8 milyon ton taxıl, o cümlədən suvarılan torpaqlarda 6,7 milyon ton taxıl yığıblar. Taxıl məhsullarının orta məhsuldarlığı bir hektardan 53-64 sentner təşkil edib, bir sıra qabaqcıl təsərrüfatlarda isə bir hektardan 70 sentneri ötüb. Taxıl dənli bitkiləri üçün əkin sahəsi praktiki olaraq ötənilki səviyyədə saxlanılıb və 1,47 milyon hektar təşkil edib.
Hazırda illik məhsulun yalnız 37 faizi dövlət qarşısında müqavilə öhdəliklərinin yerinə yetirilməsi üçün təhvil verilir, yığılan məhsulun 55 faizdən çoxu fermer təsərrüfatlarında və əhalidə qalır. 2010-cu ildə Özbəkistanda 7,3 milyon ton taxıl yığılıb, 400 min tondan çox buğda ixrac edilib.
Azərbaycan əhalisinin və iqtisadiyyatının taxıl bitkilərinə olan ehtiyacı hazırda təxminən 3-3,2 milyon ton təşkil edir. 2011-ci ildə Azərbaycanda 2,5 milyon ton taxıl istehsalı gözlənilir. Bu, ötən ilin göstəricisini 500 min ton üstələyir. Çatışmayan hissə digər ölkələrdən idxal ediləcək.
Azərbaycana əsas taxıl tədarükçüləri Rusiyanın Cənub Federal Dairəsi - Stavropol və Krasnodar, eləcə də Qazaxıstandır.
"Qazaxıstanın "Prodkorporasiya" Milli Şirkətinin bu il Azərbaycana göndərməyə planlaşdırdığı taxılın həcmi hələ ki məlum deyil", - Trend-ə təşkilatın mətbuat xidmətindən bildiriblər.
"Bu il Azərbaycana göndərilməsi planlaşdırılan taxılın həcmi bilavasitə Qazaxıstanda yığılan məhsulun həcmindən asılı olacaq", - şirkətin mətbuat katibi Kuralbek Atamuratov deyib.
Azərbaycan Dövlət Gömrük Komitəsinin məlumatına görə, 2011-ci ilin birinci yarısında taxıl idxalı 19,14 faiz - 137,986 milyon dollaradək artıb. Bu, həmin müddət ərzində ölkə idxalının ümumi həcminin 3,18 faizini təşkil edir.
2011-ci ilin yanvar-iyun aylarında Azərbaycan 48,692 milyon dollar məbləğdə un idxal edib. Bu, idxalın ümumi həcminin 1,12 faizini təşkil edir və ötən ilin analoji dövr göstəricisini 83,1 dəfə üstələyir.
İlin birinci yarısında Azərbaycanda taxıl və un göstəricilərinin artması onunla əlaqədardır ki, bu müddət ərzində bu məhsulun idxalının ƏDV-dən azad edilməsi qüvvədə olub. Nazirlər Kabinetinin 10 iyul tarixli qərarı ilə bu azad edilmələr ləğv edilib.
Ötən il ölkəyə 1,3 milyon tondan çox taxıl idxal edilib.
Azərbaycan Kənd Təsərrüfatı Nazirliyinin məlumatına görə, 2011-ci il iyunun 22-nə buğda 268 hektar ərazidə səpilib, halbuki ötən il 551 hektar ərazidə səpilmişdi.
