Azərbaycan, Bakı, 26 iyul /Trend, müxbir A.Axundov/
Azərbaycan sığortaçıları ilk növbədə əhali arasında sığortanın təbliği üzrə işi gücləndirməlidir. Azərbaycan Sığortaçılar Assosiasiyasının icraçı direktoru Azər Əliyev bu fikirdədir.
"Xalqa müxtəlif çeşiddə məhsullar təqdim etməzdən əvvəl, hər bir vətəndaş üçün sığorta institutunun izah edilməsi üzrə işi gücləndirmək lazımdır", - Əliyev bildirib.
Onun sözlərinə görə, hazırda Azərbaycanda sığorta hələki ibtidai formadadır.
"Yeni qanunların qəbul edilməsinə, sığorta şirkətlərinin hesabat sisteminin yaxşılaşmasına, onların maliyyə sabitliyinin güclənməsinə, beynəlxalq forumların keçirilməsinə baxmayaraq, əhali ilə iş bu yaxınlarda başlayıb", - Əliyev bildirib.
"Lakin daha çox şey etmək lazımdır. Maraqlı məhsullara gəldikdə, şirkətlər çalışırlar. Onlardan kimsə daima bazara yeni nəsə çıxarır", - Əliyev qeyd edib.
Hazırda Azərbaycan sığortaçıları 45 növə yaxın sığorta xidmətləri təklif edirlər. Bunun 12-si icbari növ, 6-sı həyat sığortası sahəsindədir. Dünya təcrübəsində 100-dən çox sığorta xidməti tətbiq edilir.
Hazırda Azərbaycanda 28 sığorta və 1 təkrar sığorta şirkəti işləyir.
İyulun 26-na olan rəsmi məzənnə 0,7864 AZN/USD təşkil edir.
