...

Dünya Bankının baş iqtisadçısı Azərbaycana gəlib

Biznes və iqtisadiyyat xəbərləri Materials 8 Avqust 2011 12:12 (UTC +04:00)

Azərbaycan, Bakı, 8 avqust /Trend, müxbir N.İsmayılova/

Dünya Bankının Azərbaycan üzrə baş iqtisadçısı Raşmi Şankar Azərbaycanın uzunmüddətli iqtisadi inkişafı üzrə ikinci foruma hazırlıq işlərinin aparılması məqsədilə bazar ertəsi Bakıya gəlib. Bu barədə bazar ertəsi bankın Bakı nümayəndəliyindən bildirilib.

Nümayəndəlikdən deyildiyinə görə, səfərin məqsədi ümumi makroiqtisadi məsələlərin müzakirəsidir. Şankar ölkədə avqustun 19-dək olacaq.

Dünya Bankı (DB) Azərbaycan hökuməti ilə birlikdə oktyabrın 17-18-də Azərbaycanın uzunmüddətli iqtisadi inkişafı üzrə ikinci forumu keçirməyi planlaşdırır. Forumda müzakirə ediləcək əsas məsələlər Azərbaycanda biznes mühitin yaxşılaşdırılması, biznes fəaliyyəti üçün vahid qaydaların yaradılması, eləcə də bazar iqtisadiyyatı üçün lazım olan həyat qabiliyyətli institutların yaradılmasıdır.

2009-cu il oktyabrın 21-də keçirilən Azərbaycanın uzunmüddətli iqtisadi inkişafına dair birinci forumun yekunları üzrə gələcək inkişaf məqsədilə ölkə iqtisadiyyatının şaxələndirilməsini, eləcə də irəliləyiş və nəticələrin qiymətləndirilməsi üçün yeni forumun keçirilməsini nəzərdə tutan fəaliyyət planının hazırlanması ilə bağlı razılıq əldə olunub.

Azərbaycan 1992-ci ildən DB ilə əməkdaşlıq edir və əməkdaşlıq çərçivəsində bank hazırda 43 layihənin maliyyələşdirilməsinə 2,9 milyard dollar ayırıb, bu isə Türkiyə və Qazaxıstandan sonra ölkəni portfelin həcminə görə üçüncü yerə qoyur.

Xəbər lenti

Xəbər lenti