Azərbaycan, Bakı, 10 sentyabr /Trend, müxbir N.İsmayılova/
Yanvar-iyul aylarında Azərbaycanın dövlət büdcəsinin gəlir hissəsinə faktiki ödənişlər ötən ilin müvafiq dövrü ilə müqayisədə 19,8 faiz artaraq 6 milyard 868,5 milyon manat (ÜDM-in 25,9 faizi) təşkil edib. Bu barədə Trend-ə hökumətdən bildiriblər.
Büdcə xərcləri 18,3 faiz artaraq 6 milyard 201,2 milyon manat (ÜDM-nin 23,4 faizi) olub. Büdcə qalıqları 667,3 milyon manat və ya ÜDM-in 2,5 faizini təşkil edib.
Gəlir qisminin 48,3 faizi və ya 3319,6 milyon manatı Vergilər Nazirliyi hesabına təmin olunub. Gömrük rüsumları və vergiləri 643,4 milyon manat (9,4 faiz çəki), digər mənbələr isə 2905,5 milyon manat (42,3 faiz) olub.
Hesabat dövründə ƏDV hesabına 1186,6 milyon manat təmin olunub ki, bu da ümumi gəlirlərin 17,3 faizini təşkil edir. Mənfəət vergisi üzrə 1593,1 milyon manat (23,2 faiz), gəlir vergisi - 378,4 milyon manat (5,5 faiz), aksiz vergisi - 224,2 milyon manat (3,3 faiz), əmlak vergisi - 55,2 milyon manat (0,8 faiz), yeraltı sərvətlər vergisi - 72,5 milyon manat (1,1 faiz), torpaq vergisi - 22,2 milyon manat (0,3 faiz), xarici ticarət fəaliyyəti üzrə vergi isə 220,3 milyon manat (3,2 faiz) təşkil edib.
Büdcədən əhalinin sosial müdafiəsinə 770,5 milyon manat (12,4 faiz), təhsilə 756,6 milyon manat (12,2 faiz), səhiyyəyə 243,9 milyon manat (3,9 faiz), prokurorluq, təhlükəsizlik, hüquq-mühafizə orqanları, məhkəmə hakimiyyətlərinin saxlanmasına 347,9 milyon manat (5,6 faiz), mədəniyyət, incəsənət, informasiya sahəsi və fiziki tərbiyəyə 93,8 milyon manat (1,5 faiz), iqtisadiyyata investisiyaya 2427,5 milyon manat (39,2 faiz) xərclənib.
Ümumi investisiya həcmindən mənzil-kommunal xidmətlərə 123,4 milyon manat (2 faiz), kənd və meşə təsərrüfatı, balıqçılığa 201,8 milyon manat (3,3 faiz), sənaye, tikinti və faydalı qazıntılara 1983,1 milyon manat (32 faiz), nəqliyyat və rabitəyə 29,6 milyon manat (0,5 faiz) xərclənib.
Dövlət büdcəsinin 35,4 faizi (2194,1 milyon manat) əməkhaqqı, təqaüd və digər ianələrin ödənilməsinə xərclənib.
Büdcənin 2011-ci il gəlirləri 15 554,2 milyon manat, xərcləri isə 15 941,2 manat gözlənilir.
Sentyabrın 10-na olan rəsmi məzənnə 0,7865 AZN/USD təşkil edir.
