...

DB Azərbaycana daşınmaz əmlak sahəsində elektron xidmətlərin tətbiqinin sürətləndirilməsini tövsiyə edir

Biznes və iqtisadiyyat xəbərləri Materials 6 Oktyabr 2011 14:35 (UTC +04:00)

Azərbaycan, Bakı, 6 oktyabr /Trend, müxbir A.Axundov/

Dünya Bankı (DB) Azərbaycan hökumətinə daşınmaz əmlakın qeydiyyatı və idarə olunması sahəsində özəl sektorla münasibətləri inkişaf etdirməyi tövsiyə edir. Bu barədə bankın daşınmaz əmlak sahəsində aparıcı mütəxəssisi Yohan de Yonq cümə axşamı "Müasir əmlak idarəçiliyində daşınmaz əmlakın vahid kadastrı və məkan məlumatları strukturunun rolu" mövzusunda beynəlxalq elmi-praktiki konfransda deyib.

"Bu sahənin inkişafı üçün elektron xidmətlərin tətbiqinin sürətləndirilməsi vacibdir və bu, ölkə qanunvericiliyində öz əksini tapmalıdır", - Yonq bildirib.

Onun sözlərinə görə, daşınmaz əmlak obyektləri barəsində mümkün qədər çox informasiya toplamaq lazımdır.

"Daşınmaz əmlak obyektləri haqqında məlumat bazası mümkün qədər çox parametrləri özündə birləşdirməlidir. Bu, həmin sahədə korrupsiyanın azalmasına yardım edir", - Yonq deyib.

Mütəxəssis hesab edir ki, bu bazaya əhalinin tam çıxışı təmin olunmalıdır.

Hazırda DB ölkə hökuməti ilə birlikdə Azərbaycanda daşınmaz əmlakın qeydiyyatı layihəsini həyata keçirir.

Azərbaycan hökuməti və Dünya Bankı 2007-ci ilin iyulunda daşınmaz əmlakın vahid kadastr sisteminin birgə tətbiqi barədə saziş imzalayıblar. Layihə 4 komponentdən ibarətdir - daşınmaz əmlak qeydiyyatı, dövlət əmlakı idarəsi və reyestri, baza torpaq xəritəsi və torpaq kadastrı, treninqlər, siyasətin formalaşması və layihənin idarəsi.

Layihənin dəyəri 38,57 milyon dollar təşkil edir, onun 30 milyon dolları Dünya Bankının kreditinin payına düşür. Kredit resursları beş illik güzətli dövr ərzində 20 illik müddətə ayrılıb.

Xəbər lenti

Xəbər lenti