Azərbaycan, Bakı, 15 oktyabr /Trend, müxbir İ.Xəlilova/
Azərbaycan bankı "Paşa Bank" beynəlxalq kredit reytinqi aldıqdan sonra borc iltizamlarının buraxılışı imkanlarını araşdırmağı planlaşdırır. Bunu şənbə günü Trend-ə "Paşa Bank"ın idarə heyətinin sədri Fərid Axundov deyib.
Onun sözlərinə görə, istisna edilmir ki, ilk borc iltizamlarının buraxılması 2013-cü ilə təsadüf edəcək.
Bank beynəlxalq kredit reytinqi agentlərindən kredit reytinqini özünün üçillik strategiyasını başa çatdırdıqdan sonra almağı planlaşdırır. "Buna uyğun olaraq, biz reytinq işlərinə 2012-ci ildə mövcud strategiyanı reallaşdırdıqdan sonra start verəcəyik. Mövcud strategiya 2009-2011-ci illəri əhatə edir", - Axundov qeyd edib.
O deyib ki, bankın planlarına ən az iki şirkətdən reytinq almaq daxildir.
"Reytinqlərin müəyyənləşdirilməsinin və kapital bazarında ilkin addımlarımızın yekununda biz borc iltizamlarının buraxılmasının vacibliyi barədə düşünəcəyik. Bu prosesin gələn il baş vermə ehtimalı olduqca azdır. Lakin 2012-ci ilin ikinci yarısından başlayaraq və ya bir ildən sonra biz minimum avrobrendlərin buraxılması məqsədilə xarici bazardakı vəziyyəti və konyunkturanı ciddi şəkildə müşahidə edəcəyik", - Axundov vurğulayıb.
Avrobrendlərin buraxilması barədə Azərbaycanın daha iki bankı da məlumat yaymışdı, lakin daxili bazardakı vəziyyət bu işi təxirə saldı.
Azərbaycan Beynəlxalq Bankı 200 milyon dollar, Unibank 150 milyon dollar, Bank Standard 150-200 milyon dollar, Texnika Bank 200 milyon dollar həcmində avro istiqraz vərəqələrini yerləşdirəcəyi barədə məlumat vermişdi. Həmin banklardan ancaq Texnika Bank 2008-ci ildə öz avro istiqraz vərəqələrini yerləşdirdi. Bank təmin edilməmiş avro istiqrazlarının ilk emissiyasını yerləşdirmək üçün Niderlandda "Texnika Finance B.V". şirkətini qeydiyyatdan keçirib. Texnika Bank istiqraz vərəqələri vasitəsilə 26 milyon dollar həcmində kredit cəlb etməyə nail olub. Cəlb edilən kreditin faiz dərəcəsi 12,75 faiz, ödəmə müddəti isə 2009-cu il olub.
"Paşa Bank" 2007-ci ilin iyununda yaradılıb və Azərbaycan Mərkəzi Bankının 28 yanvar 2007-ci il tarixli lisenziyası əsasında fəaliyyət göstərir. "Paşa Bank" ASC "Paşa Sığorta", "Paşa Həyat", "Paşa Travel" və "Paşa Tikinti" ilə birgə "Paşa Holdinq"in tərkibinə daxildir. Holdinq faktiki olaraq klassik holdinq yox, investisiya şirkətidir. "Pasha Group"un strukturuna "Kapital Bank" da daxildir. Orada holdinq səhmlərin 99,75 faizi məxsusdur.
Bankın səhmdarları strukturunda pay bölgüsü bu şəkildədir: "Paşa Holdinq"ə səhmlərin 60 faizi, ADOR ltd şirkətinə 30 faiz, Arif Paşayevə 10 faiz məxsusdur.