Azərbaycan, Bakı, 3 noyabr /Trend, müxbir N.İsmayılova/
Azərbaycan Beynəlxalq Bankı (ABB) ölkədə qızıl istehsalçısı "Anglo Asian Mining Plc" şirkətinin 15 milyon dollar məbləğində kredit borcunun qalıqları üzrə faiz dərəcələrini azaldıb. Trend-in məlumatına görə, bu barədə şirkətin rəsmi saytında yerləşdirilmiş məlumatda deyilir.
Kredit müqaviləsinin yeni şərtlərinə görə, 2011-ci il oktyabrın 1-dən "Anglo Asian Mining Plc" şirkəti üçün ABB-nin illik faiz dərəcələri əvvəllər müəyyən edilmiş 15 faizə qarşı 12 faiz təşkil edir.
"Kreditin dərəcəsinin azalması qismən şirkətin risk profilinin azalması və ABB-yə kredit xidməti üzrə cədvəli qabaqlaması olub", - şirkətin məlumatında deyilir.
ABB-nin krediti üzrə borcun ümumi məbləğinin ödənilməsini 2013-cü ilin iyununda başa çatdırmaq planlaşdırılır. 2011-ci ilin birinci rübü ərzində şirkət özünün əsas kreditoru olan Azərbaycan Beynəlxalq Bankına 8,6 milyon dollar verib.
Məlumatda deyildiyi kimi, 2012-ci il ərzində şirkət ABB-yə 13,2 milyon dollar, 2013-cü ildə isə yerdə qalan 1,8 milyon dollar ödəyəcək.
"Anglo Asian Mining PLC" şirkəti 1997-ci ilin avqustunda Azərbaycan hökuməti ilə imzalanan PSA tipli saziş əsasında Azərbaycanın cənub-qərbində yerləşən altı - "Gədəbəy", "Ordubad", "Qoşa Bulaq", "Qızıl Bulaq", "Vejnəli" və "Söyüdlü" yataqlarının işlənməsi hüququna malikdir. Müqaviləyə əsasən, yataqlardan 400 ton qızıl, 2500 ton gümüş və 1,5 milyon ton mis hasil etmək planlaşdırılır.
