Azərbaycan, Bakı, 5 noyabr /Trend müxbir A.Axundov/
Bakının təkrar mənzil bazarında bir kvadratmetrin orta qiyməti oktyabrda 1345-dən 1340 dollara qədər azalıb. Bu barədə şənbə günü Trend-ə "MBA Group" konsaltinq şirkətinin baş direktoru Nüsrət İbrahimov deyib.
"Bu, birbaşa bazarda tələbatın azalması ilə bağlıdır", - İbrahimov bildirib.
Onun sözlərinə görə, bahalı mənzillərin orta qiyməti ötən ilin analoji dövrü ilə müqayisədə aşağı düşüb ki, bu da təkliflər portfelində bahalı mənzillərin payının artması ilə izah edilir.
"Qiyməti 68-75 min manat olan mənzillər bazarda ən böyük paya sahibdir - 26,9 faiz. Orta otaq göstəricisi 2,52 faiz təşkil edir. Hər bir otağın orta qiyməti 44928 dollar, mənzilin orta qiyməti 113219 dollar, mənzilin nominal dəyəri 89285 dollar təşkil edir", - İbrahimov deyib.
Onun sözlərinə görə, qiymətlər əsasən "Kiyev", "Minsk" və "Fransız" layihəli mənzillər üzrə artıb.
"Bu daha çox onunla əlaqədardır ki, onlar ipoteka predmetidir. "arxitektur", "axundovkalar" və "italyankalar" üzrə qiymətlər isə aşağı düşüb" , - İbrahimov deyib.
Onun sözlərinə görə, satış portfelində ucuz mənzillərin payı 58,1-dən 57,7 faizə düşüb, orta və bahalı mənzillər isə 41,9-dan 42,3 faizə yüksəlib.
"Bu onunla izah edilir ki, əksər alıcılar ipoteka kreditinin imkanlarından istifadə edirlər", - İbrahimov deyib.
