Azərbaycan, Bakı, 8 noyabr /Trend, müxbir N.İsmayılova/
Oktyabrın 1-nə Azərbaycanda ödəniş kartlarının sayı 4,459 milyon ədəd təşkil edib ki, bu da sentyabr ayı üzrə 0,2 faiz, 2010-cu ilin analoji dövrü ilə müqayisədə isə 9,9 faiz artım deməkdir. Trend-in məlumatına görə, bu barədə bazar ertəsi Mərkəzi Bankın saytında dərc olunmuş statistik hesabatda deyilir.
Sentyabr ayı ərzində bankomatlar və POS-terminallar vasitəsilə ödəniş kartları ilə ümumi dövriyyə 626 milyon manat olub, əməliyyatların ümumi sayı isə 4,35 min ədəd təşkil edib.
Sentyabr ayı ərzində debet kartları ilə əməliyyatların sayı 549 milyon manat məbləğində 4083 min ədəd təşkil edib.
Bankomatlar vasitəsilə debet kartlarla əməliyyatların ümumi sayından 516 milyon manat məbləğində 3840 min, POS-terminallar vasitəsilə isə 19 milyon manat məbləğində 138 min əməliyyat yerinə yetirilib.
Sentyabrda kredit kartları ilə 78 milyon manat məbləğində 267 min əməliyyat yerinə yetirilib.
Bankomatlar vasitəsilə kredit kartları ilə əməliyyatların ümumi sayından 28 milyon manat məbləğində 98 min əməliyyat, POS-terminallar vasitəsilə isə 17 milyon manat məbləğində 34 min əməliyyat yerinə yetirilib.
Oktyabrın 1-nə olan məlumata görə, ölkədə 2056 bankomat fəaliyyət göstərib ki, onlardan 1144-ü Bakıda, 912-si isə ölkənin digər şəhər və rayonlarında yerləşir.
Hesabat dövründə POS-terminalların sayı 12 204 ədəd təşkil edib ki, onlardan 11 207-si Bakıda, 997 ədədi isə digər şəhər və rayonlarda yerləşir.
