Azərbaycan, Bakı, 11 noyabr /Trend, müxbir А.Axundov/
Azərbaycanda turizm bazarının inkişafı turizm şirkətlərinin sayının artırılmasını tələb edir. Trend-in məlumatına görə, bu barədə cümə günü mədəniyyət və turizm nazirinin müavini Vaqif Əliyev bildirib.
"Azərbaycanda turizmin yeni istiqamətləri səbəbindən bu sahədə çalışan yeni şirkətlər yaradılacaq. Məsələn, bizdə elmi turizm, ekoloji turizm, müalicə turizmi və digər sahələrdə böyük potensial var. Bu sahələrdə yeni şirkətlər lazımdır", - Əliyev deyib.
Onun sözlərinə görə, şirkətlərin sayı bazarın tələbləri ilə tənzimlənəcək.
Bu gün Azərbaycanda təxminən 207 lisenziyalaşdırılmış turizm şirkəti fəaliyyət göstərir.
Dövlət Statistika Komitəsinin məlumatına görə, ilin birinci yarısının yekunları üzrə Azərbaycanda 504 hotel və mehmanxana tipli obyekt fəaliyyət göstərir ki, onların 93,3 faizi özəldir.