Azərbaycan, Bakı, 15 dekabr /Trend, müxbir N.İsmayılova/
Yanvar-noyabr aylarında Azərbaycanda sənaye istehsalı (məhsul istehsalı və sənaye xarakterli xidmətlərin göstərilməsi) 31,2 milyard manat təşkil edib ki, bu da 2010-cu ilin müvafiq dövr göstəricisindən 5 faiz azdır. Bu barədə Trend-ə Dövlət Statistika Komitəsindən bildiriblər.
Ötən ilin müvafiq dövrü ilə müqayisədə özəl sektorun payı 9,3 faiz azalaraq sənaye istehsalının ümumi həcminin 81,7 faizini təşkil edib. Bu zaman 92,7 faiz sənaye mallarının, 7,3 faiz isə sənaye xarakterli xidmətlərin payına düşüb. Qeyri-neft sektorunda məhsul istehsalı 9,7 faiz artıb.
Hesabat dövründə hasilat sənayesində istehsalın həcmi 8,2 faiz azalaraq sənaye istehsalının ümumi həcminin xüsusi çəkisinin 78 faizini, yəni 24,3 milyard manat təşkil edib. Bu dövr ərzində hasil olunan neftin həcmi 42,2 milyon ton, təbii qaz hasilatı isə 23,8 milyard kubmetr olub.
Emal sənayesinin həcmi 5,3 milyard manat təşkil edərək 7 faiz artıb. Bu dövr ərzində avtomobil, qoşqu və yarımqoşquların (8,5 faiz), rezin və plastmas məmulatların istehsalında (34,6 faiz), metallurgiya sənayesi (92,2 faiz) və kimya sənayesində (30,3 faiz), mebel (16 faiz) və geyim istehsalında (57,2 faiz) artım müşahidə olunub.
Qida məhsullarının istehsalında da 6,3 faizlik artım müşahidə edilib. Bu dövrdə ölkədə kolbasa məhsullarının istehsalı 12 faiz artaraq 1,8 ton, ət - 4,6 faiz (236 min ton), süd - 5,1 faiz (646,7 min ton), kərə yağı - 0,8 faiz (19,3 min ton), pendir və kəsmik - 2,2 faiz (40,5 min ton), qənd - 9,3 faiz (303 min ton) təşkil edib.
Dekabrın 15-nə olan rəsmi məzənnə 0,7863 AZN/USD təşkil edir.