Azərbaycan, Bakı, 23 dekabr /Trend, müxbir E.İsmayılov/
Dubayın sürətlə inkişaf edən "Flydubai" aviaşirkəti Yaxın Şərqdə ilk dəfə olaraq, təyyarənin göyərtəsində təhlükəsizlik tədbirlərinə həsr edilmiş üçölçülü animasiya videoçarxını təqdim edib. Filmin yaradılmasında məşhur FREEJ multiplikasiya filminin müəllifləri iştirak ediblər.
Şirkətdən cümə günü Trend-ə verilən məlumata görə, ingilis və ərəb dillərində nümayiş etdirilən animasiya çarxında FREEJ serialının qəhrəmanları təhlükəsizliklə bağlı təlimat keçirlər. Göstəriş və təlimatların tam dəqiq olması üçün, müəlliflər "Flydubai" aviaşirkətinin ən təcrübəli bort baxıcısının hərəkətlərini rəqəmsal şəklə salaraq, əldə edilmiş materialı animasiya personajının yaradılmasında istifadə ediblər.
"FREEJ serialının yaradıcıları ilə birgə işimiz sərnişinlərimizə innovasiyalı yanaşmanın təzahürüdür. Təhlükəsizlik təlimatı hər bir uçuşun ayrılmaz hissəsidir. Biz belə qərara gəldik ki, bu məlumatı orijinal və özünəməxsus şəkildə təqdim edək, - aviaşirkətin baş direktoru Qeyt əl-Qeyt deyib. - Videoçarxın yaradılması barədə düşünməyə başlayarkən, dərhal FREEJ-lə əməkdaşlıq etməyə qərar verdik. Bu, Birləşmiş Ərəb Əmirliklərinin ən məşhur multiplikasiya serialıdır. O, yaş təbəqəsindən asılı olmayaraq, hamının rəğbətini qazanıb və sərnişinlərimizin diqqətini vacib məlumata cəlb etmək iqtidarındadır".
Videoçarx Fiber-To-The-Screen müasir əyləncə sistemi vasitəsilə nümayiş etdiriləcək. Ekranlar "Flydubai"ın istismar etdiyi Boeing 737-800 NG tipli təyyarələrin bütün oturacaqlarında quraşdırılıb. Filmin yaradılması zamanı "Flydubai" təlimatlarla bağlı bütün hüquqi tələblərə riayət edilməsi üçün BƏƏ-nin Mülki Aviasiya İdarəsinin (GCAA) nümayəndələri ilə məsləhətləşmələr aparıb.
Videoçarxa aşağıdakı istinad vasitəsi ilə seyr etmək mümkündür: http://youtu.be/eLm1ccPrPiM