Azərbaycan, Bakı, 17 yanvar /Trend, müxbir A.Axundov/
2012-ci ildə Azərbaycanın yeddi sığorta və bir təkrar sığorta şirkətinin sığorta fəaliyyəti üzrə lisenziyalarının müddəti bitir. Bu barədə çərşənbə axşamı Trend-ə Maliyyə Nazirliyi yanında Dövlət Sığorta Nəzarəti Xidmətindən məlumat veriblər.
Bunlar "Temz Sığorta Qrupu", "Atəşgah Sığorta", "Azərbaycan Sənaye Sığorta", "Meqa Sığorta", "Beynəlxalq Sığorta Şirkəti", "Qarant Sığorta", "Standard Insurance" sığorta şirkətləri və "AzRE" təkrar sığorta şirkətidir.
2008-ci ilin martından qüvvəyə minən "Sığorta fəaliyyəti haqqında" qanuna uyğun olaraq, bu gün ölkədə sığorta fəaliyyətinə icazə müddətsiz dövr üzrə verilir, halbuki əvvəllər lisenziya beş il müddətinə verilirdi. Yeni yaradılan şirkətlərə ilk lisenziya beş il müddətinə verilir. Şirkətlər müddətsiz lisenziya almaq üçün qüvvədə olan lisenziyanın müddəti başa çatanda müraciət edə bilərlər.
Azərbaycan Maliyyə Nazirliyi bu gün ölkədə fəaliyyət göstərən 29 sığorta şirkətindən 18-nə sığorta fəaliyyəti göstərməsi üçün müddətsiz lisenziyalar verib, yerdə qalan şirkətlərin lisenziyalaşdırılması prosesi isə yeni qanunvericiliyə uyğun olaraq 2016-cı ildə tam başa çatacaq.
"Alfa Sığorta" və "Qala Həyat Sığorta" şirkətlərinin lisenziyalarının fəaliyyət müddəti 2013-cü ildə, ötən il yaradılan "Paşa Həyat Sığorta" və "Royal Sığorta" şirkətlərinin lisenziyalarının müddəti isə 2016-cı ildə başa çatacaq.
2011-ci ildə sığorta fəaliyyəti göstərməsi üçün "Fidan Sığorta" şirkətinə verilən lisenziyanın fəaliyyəti müvəqqəti dayandırılıb. Maliyyə qeyri-sabitliyi ilə bağlı problemlərin aradan qaldırılması üçün şirkətə ayrılan altı aylıq müddət bu ilin fevral ayının sonunda başa çatır. Bu gün şirkətin vəziyyəti dəyişdirmək üçün hər hansı cəhdləri haqqında məlumat yoxdur.