Azərbaycan, Bakı, 18 yanvar /Trend, müxbir A.Axundov/
2011-ci ildə Azərbaycanda sənaye istehsalının həcmi (sənaye xarakterli məhsullar istehsal edilib və xidməti göstərilib) 34,5 milyard manat təşkil edib ki, bu da 2010-cu ilin analoji göstəricisindən 5 faiz azdır. Bu barədə çərşənbə günü Trend-ə Dövlət Statistika Komitəsindən məlumat verilib.
Ötən ilin analoji dövrü ilə müqayisədə özəl sektorun payı 9,9 faiz azalaraq ümumi sənaye istehsalının 81,5 faizini təşkil edib. Bununla yanaşı, 92,7 faiz sənaye məhsulları istehsalının, 7,3 faiz isə sənaye xarakterli xidmətlərin payına düşür.
Sənayenin qeyri-neft sektorunda məhsul istehsalı 11,1 faiz artıb.
Hesabat dövründə hasilat sənayesində istehsal həcmi 8,4 faiz azalaraq bütün sənaye istehsalının 77,9 faizlik xüsusi çəkisində 26,9 milyard manat təşkil edib. Hesabat dövründə hasil edilən neftin həcmi 45,4 milyon ton, təbii qazın hasilatı isə 25,7 milyard kubmetr təşkil edib.
Emal sənayesində istehsalın həcmi 7,1 faiz artaraq 5,9 milyard manat təşkil edib. Əhəmiyyətli artım rezin və plastmas məmulatların istehsalında (47,2 faiz), metallurgiya sənayesində (85,9 faiz), kimya sənayesində (27,1 faiz), mebel istehsalında (24,5 faiz), geyimdə (13,9 faiz) müşahidə edilib.
Həmçinin, qida məhsulları istehsalında 5 faizlik əhəmiyyətli artım qeydə alınıb. Ölkədə kolbasa istehsalı 12,3 faiz artaraq iki min ton təşkil edib, ət istehsalı 4,6 faiz (258 min ton), süd istehsalı 5,4 faiz (708,9 min ton), kərə yağı istehsalı 0,8 faiz (21,1 min ton), pendir və kəsmik istehsalı 2,2 faiz (708,9 min ton) artıb.
Yanvarın 18-nə olan rəsmi məzənnə 0,7862 AZN/USD təşkil edir.
