...

İslam İnkişaf Bankı Azərbaycan ilə enerji sektorunda əməkdaşlığın perspektivlərini müzakirə edəcək

Biznes və iqtisadiyyat xəbərləri Materials 26 Yanvar 2012 15:53 (UTC +04:00)

Trend-i buradan izləyin

Azərbaycan, Bakı, 26 yanvar /Trend, müxbir N.İsmayılova/

İslam İnkişaf Bankı (İİB) Azərbaycan hökuməti ilə enerji sektorunda əməkdaşlığın genişləndirilməsi imkanlarını müzakirə edir. Bu barədə Trend-ə cümə axşamı bankın Bakı ofisindəki mənbə məlumat verib.

İİB-in Enerji şöbəsi rəhbərinin səlahiyyətlərini icra edən Hüseyn Müqabilin başçılıq etdiyi missiya yanvarın 23-dən 25-dək Bakıda olub.

"Missiyanın səfəri çərçivəsində enerji sektoru üzrə məlumat təqdim olunub. Bankın ekspertləri enerji sektorundakı hazırkı vəziyyətlə tanış olub, əməkdaşlığın perspektivləri və imkanlarını müzakirə ediblər", - İİB-dən bildiriblər.

Bu gün İİB ölkənin enerji sektorunda iki layihə reallaşdırır: Mingəçevir SES-in yenidən qurulmasının II fazası və 800 meqavatlıq Cənub stansiyasının (Əli Bayramlı istilik elektrik stansiyası yaxınlığında) tikintisi.

İİB Direktorlar Şurası hələ 2007-ci ilin yanvarında bu layihənin maliyyələşdirilməsi üçün 80 milyon dollar kreditin ayırılmasını təsdiqləyib. Layihənin əlavə xərcləri (25 milyon dollar) Azərbaycan hökumətinin payına düşür. İİB-in layihəyə ayıracağı kredit güzəştli müddətlə 15 ilə verilir. Belə ki, kredit 3 ilə və 5,95 faiz dərəcəsi ilə ayrılır.

Azərbaycan 1992-ci ildən İİB-in üzvüdür və hazırda bankın ölkə üzrə portfeli 700 milyon dollara çatır. Bankın kapitalında ölkənin iştirak payı 0,13 faiz təşkil edir.

İslam İnkişaf Bankı 1975-ci ildə təsis edilib. Yarandığı vaxtdan bankın kapitalı on beş dəfə artaraq, iki milyard İslam dinarından 30 milyard İslam dinarına (İslam dinarı İİB-in hesab vahididir və Beynəlxalq Valyuta Fondunun bir xüsusi kredit hüququna ekvivalentdir) çatıb.

Xəbər lenti

Xəbər lenti