Azərbaycan, Bakı, 27 yanvar /Trend, müxbir A.Axundov/
Azərbaycanda daxili istehsalın inkişafı ilə büdcə gəlirlərində gömrük ödənişlərinin payı azalacaq. Bu barədə cümə günü Trend-ə Dövlət Gömrük Komitəsinin rəhbəri Aydın Əliyev bildirib.
"Ölkə üçün məhsulların gətirilməsi asılılığının azaldılması və daxili istehsalın artırılması vacibdir. Büdcə gəlirlərində gömrük ödənişlərinin payının az olması daxili istehsalın yüksək səviyyəsini əks etdirir", - Əliyev qeyd edib.
Onun sözlərinə görə, məsələn, ABŞ-da büdcə gəlirlərində gömrük ödənişlərinin payı 1 faizdən aşağı səviyyədədir.
2010-cu ildə Azərbaycanın dövlət büdcəsi gəlirlərində gömrük gəlirlərinin xüsusi çəkisi 9,66 faiz, 2011-ci ildə 7,27 faiz olub, 2012-ci il üçün proqnozlar hesaba alınmaqla isə 7,3 faiz təşkil edəcək.
1993-2011-ci illərdə dövlət büdcəsinə gömrük ödənişlərinin səviyyəsində illik artım nümayiş olunub. Əgər 1994-cü ildə dövlət büdcəsinə gömrük rüsumlarından və vergilərdən 3,48 milyon manat vəsait daxil olubsa, 2012-ci ildə bu göstərici 1,2 milyard manat səviyyəsində proqnozlaşdırılır.
DGK 2011-ci il üzrə ödəniş proqnozunu yerinə yetirib.
Beləliklə, 2011-ci ildə DGK xətti ilə dövlət büdcəsinə 1,14 milyard manat vəsait köçürülüb ki, bu da proqnoza uyğundur.
Ötən ilin dekabrında gömrük rüsumlarından daxilolmalar 33,117 milyon manat, idxal olunan mallara əlavə dəyər vergisi - 67,23 milyon manat, aksizlər - 6,83 milyon manat, yol vergisi - 0,95 milyon manat olub.
2010-cu ildə DGK proqnoza 100,16 faiz əməl edərək dövlət büdcəsinə planlaşdırılan 1,1 milyard manata nisbətdə 1 101,73 milyon manat vəsait köçürüb.
Yanvarın 27-nə olan rəsmi məzənnə 0,7863 AZN/USD təşkil edir.
